Minister | గ్రామాన్ని అభివృద్ధి చేస్తా..
మంత్రి వాకిటి శ్రీహరి సహకారంతో
సంక్షేమ పథకాలు అమలుకు కృషి
పెద్దపోర్ల కాంగ్రెస్ సర్పంచ్ అభ్యర్థి కమ్మరి మణెమ్మ
Minister | ఊట్కూర్,ఆంధ్రప్రభ : పెద్ద పొర్ల గ్రామ ప్రజలు అండగా నిలిచి ఎన్నికల్లో గెలిపిస్తే మంత్రి వాకిటి శ్రీహరి సహకారంతో అర్హులు అందరికీ సంక్షేమ పథకాలు అమలుకు కృషి చేస్తానని సర్పంచ్ కాంగ్రెస్ బలపరిచిన పెద్దపోర్ల అభ్యర్థి కమ్మరి మణెమ్మ నర్సింలు అన్నారు. నారాయణపేట జిల్లా ఊట్కూర్ మండల పరిధిలోని పెద్దపోర్ల గ్రామంలో ఇవాళ వార్డు అభ్యర్థులతో కలిసి ఇంటింటి ప్రచారం విస్తృతం చేశారు.
ఈసందర్భంగా ఆమె మాట్లాడుతూ… ప్రభుత్వ సంక్షేమ పథకాలు అర్హులైన ప్రతి ఒక్కరికి మంజూరు చేయడంతో పాటు గ్రామ సమస్యల పరిష్కారానికి శక్తి వంచన లేకుండా కృషి చేస్తానన్నారు. కాంగ్రెస్ పార్టీ బలపరిచిన తనను గెలిపిస్తే ప్రభుత్వం అధికారంలో ఉండడంతో నిధులు తీసుకువచ్చి అభివృద్ధి చేస్తానన్నారు. గ్రామానికి ప్రతినిత్యం ఆర్టిసి బస్సు వచ్చే విధంగా చూస్తానని అర్హులందరికీ ఇందిరమ్మ ఇండ్లు పెన్షన్లు మంజూరు చేస్తానన్నారు.
గ్రామంలో మౌలిక సదుపాయాలు కల్పించడంతో పాటు సీసీ రోడ్లు, డ్రైనేజీలు ఏర్పాటు చేసి చెరువుకట్ట వద్ద రహదారి మరమ్మతులు చేపడతానన్నారు. మహిళగా పోటీ చేసేందుకు మంత్రి అవకాశం కల్పించారని గ్రామస్తులు అందరూ ఆదరించి ఓట్లు వేసి గెలిపిస్తే గ్రామాభివృద్ధి లక్ష్యంగా కృషి చేస్తానన్నారు. ఈ కార్యక్రమంలో కాంగ్రెస్ నాయకులు వార్డు అభ్యర్థులు తదితరులు పాల్గొన్నారు.
