Korutla | సర్పంచ్ బరిలో తల్లి, కూతుళ్ళు …
- తిమ్మాయిపల్లి సీటు కోసం ఫైట్
కోరుట్ల, ఆంధ్రప్రభ : రాజకీయాల్లో ఆత్మీయులు… బంధువులు.. బంధత్వాలు ఉండవని మరోసారి రుజువైంది. జగిత్యాల జిల్లా కోరుట్ల మండలం తిమ్మాయిపల్లి సర్పంచ్ వారిలో తల్లి కూతుళ్ళు పోటీ పడటమే ఇందుకు నిదర్శనం. గ్రామ మాజీ సర్పంచ్ శివరాత్రి రాజిరెడ్డి సతీమణి గంగమ్మ వారి కూతురు సుమలత సర్పంచ్ కోసం పోటీ పడుతున్నారు.
తాజా రిజర్వేషన్లలో తిమ్మాయిపల్లి గ్రామపంచాయతీ బీసీ మహిళకు కేటాయించారు. దీంతో గంగమ్మ తో పాటు ఆమె కూతురు నామినేషన్ వేశారు. అయితే ఎవరో ఒకరు పోటీలో నుండి తప్పుకుంటారు అనుకుంటే పొరపాటే. తల్లి కూతుర్ల మధ్య సత్సంబంధాలు లేకపోవడం కచ్చితంగా బరిలో ఉండాలని నిర్ణయించుకోవడం ఇక్కడ విశేషం.
సుమలత 8 ఏళ్ల క్రితం అదే గ్రామానికి చెందిన యువకుడ్ని ప్రేమించి పెళ్లి చేసుకోవడంతో వీరి మధ్య సత్సంబంధాలు లేకుండా పోయాయి. మాజీ సర్పంచ్ భార్య గంగమ్మకు భారత రాష్ట్ర సమితి మద్దతు తెలుపుతుండగా సుమలతకు అధికార కాంగ్రెస్ పార్టీ మద్దతు తెలుపుతోంది. పాలకవర్గం రద్దు అయ్యే వరకు రాజిరెడ్డి సర్పంచ్ గా పనిచేశారు.
తిమ్మాయిపల్లి గ్రామంలో 506 ఓట్లు ఉండగా సర్పంచ్ స్థానం కోసం నలుగురు నామినేషన్లు వేసిన తల్లి కూతుర్ల మధ్యే ప్రధాన పోటీ ఉంటుందని గ్రామస్తులు తెలియజేశారు. దీంతో తల్లి కూతుర్ల మధ్య గెలుపు ఎవరిదనీ అంశం గ్రామంలో చర్చనీ అంశంగా మారింది.
