భారత్-ఇంగ్లాండ్ మ‌ధ్య జ‌రుగుతున్న తొలి టెస్ట్ మ్యాచ్ ఆసక్తికర మలుపు తీసుకుంది. మూడో రోజు టీ విరామానికి సమయానికి ఇంగ్లాండ్ 465 పరుగులకు ఆలౌట్ చేసిన భారత్ స్వల్పంగా పైచేయి సాధించింది. బౌలర్లలో జస్ప్రీత్ బుమ్రా ఐదు వికెట్లతో మెరిశాడు. ప్ర‌సిద్ధ్ కృష్ణ మూడూ, మహ్మద్ సిరాజ్ రెండు వికెట్లు తీసి బుమ్రాకు తోడయ్యారు. దీంతో ఇంగ్లాండ్ పై భారత్‌కు 6 పరుగుల ఆధిక్యం లభించింది.
209/3 స్కోరు వద్ద మూడో రోజు ఆట ప్రారంభించిన ఇంగ్లాండ్ మొదటి సెషన్‌లో స్థిరంగా ఆడింది. అద్భుతంగా రాణించిన హ్యారీ బ్రూక్ 99 పరుగుల వద్ద దురదృష్టవశాత్తూ సెంచరీని కోల్పోయాడు. అతనికి జేమీ స్మిత్ (40), కెప్టెన్ బెన్ స్టోక్స్ (20) మద్దతుగా నిలిచారు. బ్రూక్-స్మిత్ మ‌ధ్య ఆరో వికెట్‌కు 73 పరుగుల కీలక భాగస్వామ్యం జరిగింది. దీంతో లంచ్ సమయానికి ఇంగ్లాండ్ 327/5తో నిలిచింది.
తరువాతి సెషన్‌లో భారత్ న్యూబాల్ తీసుకుని దూకుడుగా బౌలింగ్ చేసింది. చివర్లో క్రిస్ వోక్స్ (38), బ్రైడన్ కార్స్ (22) కలిసి వేగంగా రాణించి 55 పరుగుల భాగస్వామ్యం అందించారు. అయితే చివరకు బుమ్రానే ఇన్నింగ్స్‌ను ముగించి భారత పేస్ దళానికి అగ్రగామిగా నిలిచాడు.
ఇప్పటివరకు మ్యాచ్ సమంగా ఉన్నా, భారత్ రెండో ఇన్నింగ్స్‌ను ఆత్మవిశ్వాసంగా ఆడితే విజయం దిశగా అడుగులు వేయవచ్చు. ఒకవైపు భారత్ బలమైన రెండో ఇన్నింగ్స్ లక్ష్యంగా చూసుకుంటుండగా, మరోవైపు ఇంగ్లాండ్ త్వరిత వికెట్లతో తిరిగి పట్టువదలని చూస్తోంది. చివరి రెండు రోజులు మ్యాచ్‌కి తేల్చే ఘట్టాలు కానున్నాయి.
