Temple | తిరుపతి రూరల్, ఆంధ్రప్రభ : తిరుపతి రూరల్ మండలం మంగళం పంచాయతీ వెంకటేశ్వర కాలనీలో గంగమ్మ గుడి భూమిపూజ కార్యక్రమం ఘనంగా జరిగింది. ఈ సందర్భంగా ఎమ్మెల్యే పులివర్తి నానికి కూటమి ప్రభుత్వ నాయకులు, కార్యకర్తలు ఘన స్వాగతం పలికారు. అమ్మవారి ఆలయంలో నిర్వహించిన ప్రత్యేక పూజల్లో ఎమ్మెల్యే పాల్గొని, స్థానిక నాయకులతో కలిసి గంగమ్మ గుడి భూమిపూజ చేశారు. ఈ నేపథ్యంలో ఆలయ నిర్మాణం కోసం తనవంతు సహాయ సహకారాలు అందిస్తానని ఎమ్మెల్యే నాని హామీ ఇచ్చారు.
తరువాత ఉమ్మడి మంగళం పంచాయతీని సందర్శించిన ఎమ్మెల్యే ప్రజల సమస్యలను అడిగి తెలుసుకున్నారు. ముఖ్యంగా తాగునీటి సరఫరా, పింఛన్ల మంజూరు సమస్యలను ప్రజలు ఎమ్మెల్యే దృష్టికి తీసుకువచ్చారు. గత ప్రభుత్వంలో చిందేపల్లిలో ఇచ్చిన ఇంటి పట్టాలను రద్దు చేసి కొత్తగా మంజూరు చేయాలని మహిళలు కోరారు. పంచాయతీలోని చిన్నచిన్న సమస్యలను త్వరితగతిన పరిష్కరించాలని ఎమ్మెల్యే అధికారులు ఆదేశించారు. ఈ కార్యక్రమంలో కూటమి ప్రభుత్వ నాయకులు, కార్యకర్తలు, స్థానిక భక్తులు భారీ సంఖ్యలో పాల్గొన్నారు.
