మీ బిడ్డగా నన్ను ఆశీర్వదించండి.. అభివృద్ధి చేసి చూపిస్తా
- పెద్దజట్రం బీజేపీ సర్పంచ్ అభ్యర్థి వాకిటి వెంకటేష్
ఊట్కూర్, ఆంధ్రప్రభ : మీ బిడ్డగా సర్పంచ్ ఎన్నికల్లో ఆశీర్వదించి గెలిపిస్తే గ్రామాన్ని అభివృద్ధి చేసి చూపిస్తానని పెద్దజట్రం గ్రామ బీజేపీ సర్పంచ్ అభ్యర్థి వాకిటి వెంకటేష్ అన్నారు.
ఆదివారం నారాయణపేట జిల్లా ఊట్కూర్ మండల పరిధిలోని పెద్దజట్రం గ్రామంలో వార్డు అభ్యర్థులు, బీజేపీ నాయకులతో కలిసి ఆయన విస్తృత ప్రచారం నిర్వహించారు. ఈ సందర్భంగా వెంకటేష్ మాట్లాడుతూ.. నిస్వార్థంగా ప్రజాసేవ చేయాలనే లక్ష్యంతోనే రాజకీయాల్లోకి వచ్చానని తెలిపారు. ప్రతి ఒక్కరూ ఆదరించి ఓటు వేసి గెలిపించాలని విజ్ఞప్తి చేశారు.
పార్టీలకు అతీతంగా సంక్షేమ పథకాలు మంజూరు చేయడంతో పాటు ఎంపీడీసీ అరుణ సహకారంతో గ్రామాభివృద్ధికి కృషి చేస్తానని ఆయన పేర్కొన్నారు. గత పాలకుల నిర్లక్ష్యం కారణంగా గ్రామం అభివృద్ధికి నోచుకోలేదని, ప్రస్తుతం కేంద్ర ప్రభుత్వం అధికారంలో ఉండటంతో అభివృద్ధికి అవసరమైన నిధులు మంజూరు అయ్యే అవకాశం ఉందన్నారు.
నీతి, నిజాయితీతో కూడిన పారదర్శక పాలన అందించడమే తన ప్రధాన లక్ష్యమని వెంకటేష్ స్పష్టం చేశారు. ప్రతి వాడలో డ్రైనేజీ వ్యవస్థ, సీసీ రోడ్లు నిర్మించడంతో పాటు విద్య, వైద్య రంగాల అభివృద్ధికి ప్రత్యేకంగా కృషి చేస్తానన్నారు.
ప్రజల కోరిక మేరకే సర్పంచ్ అభ్యర్థిగా ఎన్నికల్లో నిలిచానని, అందరి నమ్మకాన్ని వమ్ము చేయకుండా గ్రామాభివృద్ధికి అంకితభావంతో పనిచేస్తానని తెలిపారు. ఈ ఎన్నికల్లో తనకు మద్దతుగా ఓటు వేసి ఆశీర్వదించాలని గ్రామస్తులను కోరారు.
ఈ కార్యక్రమంలో నాయకులు కిరణ్ కుమార్, గంగాధర్ రెడ్డి, సోమేశ్వర్ రెడ్డి, కుర్వ బండప్ప, శంకరప్ప, అంజప్ప తదితరులు పాల్గొన్నారు.
