విజ‌య‌వాడ – ఏపీ బీజేపీ (AP BJP) నూతన అధ్యక్షుడి ఎంపికపై నెలకొన్న ఉత్కంఠకు త్వరలోనే తెరపడనుంది. అధ్యక్షుడి ఎంపికపై ఆ పార్టీ అధిష్ఠానం కసరత్తు కొలిక్కి వచ్చింది. ఈ పదవికి మాజీ ఎమ్మెల్సీ, పార్టీ సీనియర్ నేత పీవీఎన్ మాధవ్ (PVN Madhav ) వైపే బీజేపీ అధిష్ఠానం మొగ్గు చూపుతున్నట్లు స‌మాచారం.
ఈ ప్రక్రియలో భాగంగా మంగళవారం విజయవాడలోని (vijayawada ) బీజేపీ రాష్ట్ర కార్యాలయంలో అధ్యక్ష ఎన్నికను అధికారికంగా నిర్వహించనున్నారు. ఇందుకు సంబంధించిన నామినేషన్ల స్వీకరణ ప్రక్రియ ఈ రోజు మధ్యాహ్నం 2 గంటల నుంచి 4 గంటల మధ్య జరగనుంది. అధిష్ఠానం సూచించిన అభ్యర్థి మాధవ్ ఈ సమయంలో తన నామినేషన్ పత్రాలను దాఖలు చేయనున్నారు. ఈ మొత్తం ఎన్నికల ప్రక్రియను పర్యవేక్షించేందుకు కర్ణాటకకు చెందిన ఎంపీ మోహన్‌ను పార్టీ పరిశీలకుడిగా నియమించింది.
అధ్యక్ష పదవి రేసులో ముందున్న పీవీఎన్ మాధవ్‌కు పార్టీలో మంచి పేరుంది. గతంలో ఆయన శాసనమండలిలో బీజేపీ ఫ్లోర్ లీడర్‌గా సమర్థవంతంగా బాధ్యతలు నిర్వర్తించారు. పార్టీ సిద్ధాంతాలపై స్పష్టమైన అవగాహన, వాగ్ధాటి ఉన్న నేతగా ఆయనకు గుర్తింపు ఉంది. ఈ నేపథ్యంలోనే రాష్ట్ర పార్టీ పగ్గాలను ఆయనకు అప్పగించాలని అధినాయకత్వం నిర్ణయించినట్లు స‌మాచారం.
