బెల్లంపల్లి పురపాలక బడ్జెట్ రూ.32.42 కోట్లు..
బెల్లంపల్లి పురపాలక బడ్జెట్ రూ.32.42 కోట్లు..
మున్సిపాలిటీ అభివృద్ధికి సమిష్టిగా కృషి చేయాలి: జిల్లా కలెక్టర్ కుమార్ దీపక్
ఏడాదిలో మురికివాడల రూపురేఖలు మారుస్తాం: ఎమ్మెల్యే గడ్డం వినోద్
ఆదాయం పెంచి.. అప్పులు తగ్గించాలి: బడ్జెట్ సమావేశంలో కలెక్టర్ ఆదేశం
ప్రజా సంక్షేమమే ధ్యేయంగా పురపాలక బడ్జెట్: మున్సిపల్ చైర్ పర్సన్ దావ స్వాతి
బెల్లంపల్లి, ఆంధ్రప్రభ : బెల్లంపల్లి పురపాలక సంఘం సర్వతోముఖాభివృద్ధికి పాలకవర్గం, అధికారులు అందరూ సమిష్టిగా కృషి చేయాలని జిల్లా కలెక్టర్ కుమార్ దీపక్ పిలుపునిచ్చారు. గురువారం బెల్లంపల్లి పురపాలక కార్యాలయ సమావేశ మందిరంలో నిర్వహించిన బడ్జెట్ సమావేశానికి ఆయన ముఖ్య అతిథిగా హాజరయ్యారు. ఈ సందర్భంగా 2026-27 సంవత్సరానికి గాను 32 కోట్ల 42 లక్షల రూపాయల అంచనా బడ్జెట్కు కౌన్సిల్ సభ్యులు ఏకగ్రీవంగా ఆమోదం తెలిపారు. ఈ కార్యక్రమంలో జిల్లా అదనపు కలెక్టర్ చంద్రయ్య, సబ్ కలెక్టర్ మనోజ్, మున్సిపల్ చైర్ పర్సన్ దావ స్వాతి, వైస్ చైర్ పర్సన్ సత్యనారాయణ, కమిషనర్ సంపత్, కౌన్సిల్ సభ్యులు పాల్గొన్నారు.
పన్నుల వసూళ్లపై కలెక్టర్ పట్టు
పురపాలక సంఘం పరిధిలో పని చేస్తున్న సిబ్బందికి సకాలంలో వేతనాలు అందించేలా చర్యలు తీసుకోవాలని, ఇందుకోసం ఇంటి పన్ను మరియు ఇతర బకాయిలను వంద శాతం వసూలు చేయాలని అధికారులను కలెక్టర్ ఆదేశించారు. పట్టణ పారిశుద్ధ్యం మెరుగుపరిచేందుకు ప్రత్యేక నిధుల ద్వారా చెత్త సేకరణ వాహనాలను సమకూర్చామని, పట్టణ అభివృద్ధి కోసం అదనంగా రెండు కోట్ల 50 లక్షల రూపాయల నిధులు మంజూరు చేసినట్లు ప్రకటించారు. విద్యుత్ ఖర్చులను తగ్గించేందుకు సౌర శక్తి దీపాలను ఏర్పాటు చేయడంతో పాటు, ముల్కల్ల నుండి నిరంతరం తాగునీటి సరఫరా జరిగేలా ప్రణాళికలు సిద్ధం చేశామని తెలిపారు. ఆదాయాన్ని పెంచుకునేందుకు ప్లాస్టిక్ వ్యర్థాల విక్రయం, షాపింగ్ కాంప్లెక్స్ అద్దెల వసూళ్లపై ప్రత్యేక దృష్టి సారించాలని స్పష్టం చేశారు.
మురికివాడల అభివృద్ధికి ఎమ్మెల్యే వినోద్ హామీ
అనంతరం బెల్లంపల్లి ఎమ్మెల్యే గడ్డం వినోద్ వెంకటస్వామి మాట్లాడుతూ రాబోయే ఏడాది కాలంలో పురపాలక సంఘం పరిధిలోని 34 వార్డులలో ఉన్న మురికివాడలను పూర్తిస్థాయిలో అభివృద్ధి చేసేందుకు ప్రణాళికాబద్ధంగా ముందుకు సాగుతామన్నారు. పారిశుద్ధ్య నిర్వహణ, ప్రభుత్వ పాఠశాలల పర్యవేక్షణ మరియు ప్రజా సమస్యల పరిష్కారంలో పాలకవర్గ సభ్యులు పూర్తి జవాబుదారీతనంతో వ్యవహరించాలని కోరారు. బడ్జెట్ కేటాయింపుల ప్రకారం నిధులను పారదర్శకంగా వినియోగించి, పట్టణాన్ని ఆదర్శంగా తీర్చిదిద్దాలని సూచించారు. నియోజకవర్గంలోని అర్హులైన ప్రతి పేదవానికీ ఇందిరమ్మ ఇళ్లు అందేలా చర్యలు తీసుకుంటామని భరోసా ఇచ్చారు.
అభివృద్ధిలో భాగస్వాములవ్వాలన్న చైర్ పర్సన్
మున్సిపల్ చైర్ పర్సన్ దావ స్వాతి మాట్లాడుతూ పట్టణ సుందరీకరణకు కౌన్సిల్ సభ్యులందరూ సహకరించాలని కోరారు. వార్డుల్లో ఎదురవుతున్న సమస్యలను ఎప్పటికప్పుడు పరిష్కరించేలా మున్సిపల్ యంత్రాంగం కృషి చేస్తోందన్నారు. ప్రజా సంక్షేమమే ధ్యేయంగా ఈ బడ్జెట్ రూపొందించామని, అందరం కలిసి బెల్లంపల్లిని ప్రగతి పథంలో నడిపిద్దామని పిలుపునిచ్చారు.
బడ్జెట్ అంచనాలు ఇలా
2026-27 ఆర్థిక సంవత్సరానికి గాను మొత్తం 32 కోట్ల 42 లక్షల రూపాయల అంచనాలతో బడ్జెట్ను ప్రతిపాదించారు. ఇందులో 4 కోట్ల 77 లక్షల రూపాయలు సాధారణ ఆదాయం కాగా, 26 కోట్ల 28 లక్షల రూపాయలు ప్రభుత్వ గ్రాంట్ల ద్వారా రానున్నాయి. మిగిలిన మొత్తాన్ని డిపాజిట్లు, అడ్వాన్సుల ద్వారా సర్దుబాటు చేయనున్నారు. పట్టణంలోని అంతర్గత రహదారులు, మురుగు కాలువలు, తాగునీటి సరఫరా మెరుగుదలకే ఈ నిధులను ప్రధానంగా కేటాయించారు.
