పల్నాడు జిల్లా మాచర్ల మున్సిపల్ ఛైర్మన్ తురకా కిశోర్‌ను ఏపీలోని కూటమి ప్రభుత్వం పదవి నుంచి తొలగిస్తూ నేడు ఉత్తర్వులు జారీ చేసింది. వరుసగా 15 కౌన్సిల్ సమావేశాలకు అతడు గైర్హాజరు కావడమే ఈ నిర్ణయానికి ప్రధాన కారణంగా తెలుస్తోంది.మున్సిపల్ పరిపాలనలో ఛైర్మన్ బాధ్యతలను సక్రమంగా నిర్వర్తించకపోవడం, ముఖ్యంగా కౌన్సిల్ సమావేశాలకు హాజరుకాకపోవడం వంటి అంశాలను ప్రభుత్వం తీవ్రంగా పరిగణించింది.
ఏపీ మున్సిపల్ చట్టంలోని సెక్షన్ 16(1)(కె) నిబంధనలను తురకా కిశోర్ ఉల్లంఘించినట్లు నిర్ధారణ కావడంతో అతడిని పదవి నుంచి తప్పిస్తున్నట్లు ప్రభుత్వ ఉత్తర్వుల్లో స్పష్టంగా పేర్కొన్నారు. తురకా కిశోర్ ప్రస్తుతం పోలీసుల అదుపులో ఉన్నట్లు కూడా ప్రభుత్వం వెల్లడించింది.గతంలో ఛైర్మన్ అధికారాలను దుర్వినియోగం చేశారన్న ఆరోపణలపై తురకా కిశోర్‌కు ప్రభుత్వం షోకాజ్ నోటీసులు జారీ చేసిన విషయం తెలిసిందే.
ఆ నోటీసులపై అతడి నుంచి ఎటువంటి స్పందన రాకపోవడంతో, తాజా పరిణామాల నేపథ్యంలో ప్రభుత్వం ఈ కఠిన నిర్ణయం తీసుకుంది.ఆంధ్రప్రదేశ్ మున్సిపల్ పరిపాలన శాఖ ప్రిన్సిపల్ సెక్రటరీ ఎస్. సురేష్ కుమార్ ఈ తొలగింపు ఉత్తర్వులను జారీ చేశారు. ఈ పరిణామం మాచర్ల రాజకీయాల్లో చర్చనీయాంశంగా మారింది. తదుపరి ఛైర్మన్ ఎంపిక ప్రక్రియపై త్వరలోనే స్పష్టత వచ్చే అవకాశం ఉంది. గతంలో వైసీపీ ప్రభుత్వ హయాంలో… టీడీపీ నేతలు బుద్దా వెంకన్న, బొండా ఉమలపై తురకా కిశోర్ దాడి చేయడం సంచలనం సృష్టించింది. కిశోర్ పై 10 వరకు కేసులు ఉన్నట్టు తెలుస్తోంది. వాటిలో మూడు హత్యాయత్నం కేసులు కాగా, మరో 7 ఇతర కేసులు ఉన్నాయి. కిశోర్ ప్రస్తుతం పోలీసుల అదుపులో ఉన్నాడు
