- క్యూఆర్ కోడ్ స్కాన్ తప్పనిసరి…
- నకిలీ మద్యం కట్టడికి “సురక్ష”
అమరావతి: ఆంధ్రప్రదేశ్‌లో నకిలీ మద్యం విక్రయాలకు అడ్డుకట్ట వేయడానికి రాష్ట్ర ప్రభుత్వం ఎక్సైజ్ శాఖ ద్వారా కఠినమైన నిబంధనలను అమలులోకి తెచ్చింది. నాణ్యమైన మద్యం మాత్రమే అమ్మేలా ఈ చర్యలు చేపట్టారు. ప్రతి మద్యం విక్రయాన్ని క్యూఆర్ కోడ్ స్కానింగ్ ద్వారా ధృవీకరించడం, రియల్-టైమ్ పర్యవేక్షణ వంటి చర్యలను ఎక్సైజ్ శాఖ తప్పనిసరి చేసింది.
మద్యం దుకాణాలు “ఇక్కడ విక్రయించే మద్యం క్యూఆర్ కోడ్ స్కానింగ్ ద్వారా నిజమైనదని ధృవీకరించబడింది” అనే హెచ్చరిక బోర్డులను తప్పనిసరిగా ప్రదర్శించాలని పేర్కొంది..
ముఖ్యాంశాలు:
- ఇకపై ప్రతి మద్యం బాటిల్‌ను ‘ఏపీ ఎక్సైజ్ సురక్ష యాప్’ ద్వారా క్యూఆర్ కోడ్ స్కాన్ చేసి మాత్రమే విక్రయించాలి. స్కాన్ చేయకపోతే నిబంధనల ఉల్లంఘనగా పరిగణించబడుతుంది.
- స్కాన్ చేసిన డేటా రియల్ టైమ్‌లో యాప్‌లో కనిపించాలి.
- వినియోగదారులకు ఇచ్చే ముందు బాటిల్‌పై ఉన్న సీల్, క్యాప్, హోలోగ్రామ్ ప్రామాణికతను లైసెన్స్‌దారు పరిశీలించాలి.
- ప్రతి దుకాణం ‘డైలీ లిక్కర్ జెన్యూన్‌నెస్ వెరిఫికేషన్ రిజిస్టర్’ నిర్వహించాలి. ఇందులో విక్రయించిన బ్రాండ్లు, బ్యాచ్ వివరాలు నమోదు చేయాలి.
- స్టాక్ అందిన తర్వాత కనీసం 5 శాతం బాటిళ్లను స్కాన్ చేయడం దుకాణాలకు విధి. ఎక్సైజ్ సిబ్బంది కూడా రోజూ ర్యాండమ్‌గా తనిఖీలు నిర్వహిస్తారు.
- నకిలీ మద్యం బయటపడితే ఫిర్యాదు చేయని లైసెన్స్‌దారుడిపై చర్యలు తీసుకుంటారు. నకిలీ మద్యం విక్రయం నిర్ధారితమైతే లైసెన్స్ రద్దుతో పాటు చట్టపరమైన చర్యలు ఉంటాయి.
- నకిలీ మద్యంపై ఫిర్యాదుల కోసం 24 గంటల పర్యవేక్షణ, కంట్రోల్ రూమ్, వాట్సాప్ హెల్ప్‌లైన్‌లు ఏర్పాటు చేస్తారు. ఫిర్యాదులను 24 గంటల్లోపు విచారించాలి.
