- ఆరుగురు కార్మికుల మృతి
ఆంధ్రప్రదేశ్‌ బాపట్ల జిల్లాలోని బల్లికురవ సమీపంలో ఘోర ప్రమాదం చోటుచేసుకుంది. సత్యకృష్ణ గ్రానైట్ క్వారీలో డ్రిల్లింగ్ పనులు జరుగుతున్న సమయంలో బండరాళ్లు ఒక్కసారిగా విరిగి పడటంతో ఆరుగురు కార్మికులు అక్కడికక్కడే మృతి చెందారు. ఈ ఘటన మరికొంతమందిని తీవ్రంగా గాయపరిచింది. శిథిలాల కింద చిక్కుకున్న వారి కోసం సహాయక చర్యలు ముమ్మరం చేశారు.
ఈ ప్రమాదం జరిగిన సమయంలో అక్కడ మొత్తం 16 మంది కార్మికులు పనిలో నిమగ్నమై ఉన్నారు. ఒక్కసారిగా భారీ శబ్దంతో బండరాళ్లు విరగపడి క్వారీలో గందరగోళం నెలకొంది. ప్రమాద స్థలానికి పోలీసులు చేరుకొని శిథిలాల కింద చిక్కుకున్నవారిని వెలికితీసేందుకు ప్రత్యేక ఆపరేషన్ చేపట్టారు. తీవ్రంగా గాయపడిన వారిని చికిత్స నిమిత్తం అద్దంకి ప్రభుత్వ ఆసుపత్రికి తరలించగా, కొందరి పరిస్థితి విషమంగా ఉందని వైద్యులు తెలిపారు.
మృతులంతా ఒడిశాకు చెందినవారని అధికారులు ప్రాథమికంగా గుర్తించారు. వారి మృతదేహాలను పోస్టుమార్టం నిమిత్తం ప్రభుత్వాసుపత్రికి తరలించారు. ప్రమాద ఘటనపై బాపట్ల జిల్లా కలెక్టర్, ఎస్పీ స్పందించి సహాయక చర్యలను వేగవంతం చేశారు. ఘటనపై పూర్తి స్థాయిలో విచారణ జరపాలని వారు స్పష్టం చేశారు.
ఇంతలోనే ముఖ్యమంత్రి చంద్రబాబు నాయుడు ఘటనపై స్పందించారు. అధికారులను ఫోన్‌లో అడిగి వివరాలు సేకరించిన ఆయన, గాయపడిన వారికి మెరుగైన వైద్యం అందించాల్సిందిగా ఆదేశించారు. ప్రమాదానికి గల కారణాలను పూర్తిగా దర్యాప్తు చేయాలని అధికారులకు సూచించారు.
