మంత్రి పొన్నం ఆసక్తికర వ్యాఖ్యలు
హైదరాబాద్, ఆంధ్ర‌ప్ర‌భ : మంత్రి అడ్లూరి లక్ష్మణ్ కుమార్ (Minister Adluri Laxman Kumar) పై అనుచిత వ్యాఖ్యల వివాదంపై మంత్రి పొన్నం ప్రభాకర్ కీలక ప్రకటన చేశారు. ఈ సందర్భంగా ఆయన మాట్లాడుతూ… “అడ్లూరి లక్ష్మణ్ నాకు అన్నలాంటోడు. కాంగ్రెస్ పార్టీలో మేము గత 30 ఏళ్లుగా నిర్మించుకున్న స్నేహబంధం రాజకీయాలకు మించినది” అని అన్నారు. తమ మధ్య పరస్పర గౌరవం ఎప్పుడూ అలాగే కొనసాగిందని, భవిష్యత్తులోనూ కొనసాగుతుందని తెలిపారు. అడ్లూరిపై తాను ఎటువంటి వ్యక్తిగత వ్యాఖ్యలు చేయలేదని స్పష్టం చేశారు.
బీసీ వర్గానికి చెందిన నాయకుడిగా తాను ఎప్పుడూ ఎవరినీ తక్కువ చూపే భావన కలిగి లేనని పొన్నం ప్రభాకర్ (Ponnam Prabhakar) చెప్పారు. రాజకీయ దురుద్దేశంతో కొంతమంది తన వ్యాఖ్యలను వక్రీకరించి వాస్తవానికి భిన్నంగా ప్రచారం చేశారని ఆరోపించారు. దీనివల్ల ఏర్పడిన అపార్థాల వల్ల అడ్లూరి లక్ష్మణ్ మనసు నొచ్చుకుందని తెలిసి తాను తీవ్రంగా విచారిస్తున్నానని తెలిపారు. కాంగ్రెస్ పార్టీ సిద్ధాంతాలను బలోపేతం చేయడం, రాహుల్ గాంధీ నాయకత్వంలో సామాజిక న్యాయం సాధనకు తాము కలిసికట్టుగా కృషి చేస్తామని మంత్రి పొన్నం ప్రభాకర్ స్పష్టం చేశారు.
