- అమెరికా టెక్ దిగ్గజాల్లో వణుకు
- ఏఐ సెక్టార్లో దక్షిణాది దూకుడే దూకుడు
ప్రపంచాన్ని అమెరికా టెక్ దిగ్గజాలు శాసిస్తున్న ఈ తరుణంలో భారతావనిలో పురుడు పోసుకున్న ‘అరట్టై’ (Arattai) మెసేజింగ్ సంచలనం సృష్టించింది. యాప్ టెక్ ప్రపంచం మదిలో కలవరం రేపింది. తమిళనాడు చెన్నైలోని జోహో కార్పొరేషన్ సృష్టితో ఈ యాప్ అగ్రశ్రేణి వాట్సాప్‌కు చుక్కలు చూపిస్తోంది. కీలక పోటీదారుగా మార్కెట్ లోకి వ‌చ్చింది.
వినియోగదారుల నుంచి కేంద్ర మంత్రుల వరకూ అందరూ శభాష్ మేడ్ ఇన్ ఇండియా అరట్టె.. ఇది మామూలు అరెట్టె కాదు గురూ.. అమెరికాను అర పెట్టెలో పెట్టినట్టే అని వ్యాఖ్యానాలు చేస్తున్నారు.
కాగా, ఈ మేడ్ ఇన్ ఇండియా ఆరట్టై మెసేజింగ్ యాప్ పనిలో పనిగా తనకంటూ ఒక ప్రత్యేక స్థానాన్ని స్థిర పర్చుకునే ప్రయత్నంలో ఉంది. బలమైన పోటీదారుగా నిలబడటానికి ముందు ఈ వాట్సాప్‌కు కొన్ని ముఖ్య లోపాలను, సవాళ్లను అధిగమించాల్సిన అవసరం ఉంది.
అరట్టై.. సవాళ్లు !!
యాప్‌లో ప్రస్తుతం ఉన్న ఒక ప్రధాన లోపం ఏమిటంటే, వీడియో, ఆడియో కాల్స్‌కు, అలాగే సాధారణ టెక్స్ట్ మెసేజ్‌లకు ఎండ్- టు -ఎండ్ ఎన్‌క్రిప్షన్ (E 2 EE) అందుబాటులో లేకపోవడం. ఇది గోప్యతకు అత్యంత ప్రాధాన్యతనిచ్చే వినియోగదారులను కొంత నిరాశకు గురి చేస్తోంది. ఎందుకంటే, మెసేజింగ్ యాప్‌లలో కమ్యూనికేషన్ భద్రతను నిర్ధారించడానికి E2EE అనేది ఒక ప్రామాణికమైన అంశంగా మారింది. అయితే, ఈ భద్రతా లోపాన్ని సరిదిద్దేందుకు కంపెనీ కృషి చేస్తున్నట్లు ప్రకటించడం కొంత ఊరటనిచ్చే అంశం.
యూజర్ బేస్, విస్తృత నెట్‌వర్క్
మెసేజింగ్ యాప్ విజయవంతం కావాలంటే, అది విస్తృత యూజర్ బేస్‌ను కలిగి ఉండటం చాలా ముఖ్యం. ఆరట్టై యూజర్ బేస్ ఇంకా తక్కువగా ఉండటం మరో సవాలు. ఒక యాప్ బలంగా నిలబడాలంటే, వినియోగదారులు తమ స్నేహితులు, కుటుంబ సభ్యులు, సహోద్యోగులు కూడా అదే యాప్‌ను ఉపయోగిస్తున్నప్పుడు మాత్రమే దాన్ని ఎక్కువగా వాడుతారు. వాట్సాప్ లాంటి విస్తృత నెట్‌వర్క్ ఇంకా ఆరట్టైకి లేకపోవడం వల్ల, కొత్త వినియోగదారులను ఆకర్షించడం కొంత కష్టమవుతోంది.
సాంకేతిక, ఫీచర్ల లోపాలు..
ఈ యాప్ ఇంకా అభివృద్ధి దశలోనే ఉండ‌టంతో.. కొంతమంది వినియోగదారులు OTP (వన్ టైమ్ పాస్‌వర్డ్) ఆలస్యం అవ్వడం, అలాగే యాప్ నెమ్మదిగా పని చేయడం వంటి సాంకేతిక సమస్యలను ఎదుర్కొంటున్నారు. అంతేకాకుండా, UPI చెల్లింపులు, కొత్త స్టిక్కర్లు, GIFల వంటి ఫీచర్లలో కూడా ఇది ఇంకా వాట్సాప్‌తో పోటీ పడే స్థాయికి చేరుకోలేదు. వినియోగదారుల అనుభవాన్ని మెరుగుపరచడానికి, ఈ ఫీచర్లను జోడించి, యాప్ పనితీరును మెరుగుపరచడం చాలా అవసరం.
ఈ లోపాలను అధిగమించగలిగితే, భవిష్యత్తులో ఆరట్టై నిజంగా వాట్సాప్‌కు బలమైన పోటీదారుగా మారే అవకాశం ఉంది. దీనికి ప్రధాన కారణం, ఆరట్టైలో వినియోగదారుల డేటా మొత్తం భారతదేశంలోని సర్వర్‌లలోనే నిల్వ అవుతుంది. దేశీయంగా డేటాను నిల్వ చేయడం వల్ల, గోప్యత, భద్రత విషయంలో వినియోగదారులకు నమ్మకం పెరుగుతోంది. ఇది విదేశీ యాప్‌లకు ప్రత్యామ్నాయాన్ని కోరుకునే భారతీయ వినియోగదారులకు ముఖ్యమైన ఆకర్షణగా నిలుస్తుంది.
టెక్నాలజీ, ఏఐ రంగాల్లో దక్షిణాది దూకుడు..
భారతదేశం సాంకేతిక రంగంలో స్వయం సమృద్ధిని సాధించేందుకు ఆరట్టై వంటి యాప్‌లు కృషి చేస్తుండగా, మరోవైపు ఆంధ్రప్రదేశ్, తెలంగాణ ప్రభుత్వాలు తమ వ్యూహాత్మక పెట్టుబడులతో దక్షిణాది రాష్ట్రాలలో టెక్నాలజీకి కొత్త దిశానిర్దేశం చేస్తున్నాయి.
తెలంగాణ రాజధాని హైదరాబాద్‌ను గ్లోబల్ టెక్ సెంటర్‌గా నిలపడానికి ‘ఫ్యూచర్ సిటీ’ వ్యూహాలు అమలు చేస్తుండగా, ఆంధ్రప్రదేశ్ ప్రభుత్వం కూడా విశాఖపట్నం , విజయవాడ వంటి నగరాల్లో అత్యాధునిక టెక్నాలజీ పార్కులు, ఇన్నోవేషన్ హబ్‌ల కోసం కోట్ల రూపాయలు వెచ్చిస్తోంది.
ఈ దార్శనికత కేవలం సంప్రదాయ ఐటీ సేవలపైనే కాకుండా, ఆర్టిఫిషియల్ ఇంటెలిజెన్స్ (AI), మెషిన్ లెర్నింగ్, డేటా సైన్స్ వంటి భవిష్యత్ టెక్నాలజీలపై కేంద్రీకృతమై ఉంది. స్థానిక యువతకు ప్రపంచ స్థాయి శిక్షణ అందించడానికి AI పరిశోధన కేంద్రాలు, ఎక్సలెన్స్ కేంద్రాల స్థాపనకు నిధులు కేటాయించడం ద్వారా ప్రపంచ స్థాయి శిక్షణను అందించాలని ఈ ప్రభుత్వాలు లక్ష్యంగా పెట్టుకున్నాయి.
దక్షిణాది రాష్ట్రాల ఈ భారీ పెట్టుబడులు భారతీయ యువతకు ఊహించని ఉపాధి అవకాశాలను కల్పిస్తున్నాయి. సంప్రదాయ ఐటీ ఉద్యోగాలతో పాటు, AI రీసెర్చ్, డేటా అనలిటిక్స్, సైబర్ సెక్యూరిటీ వంటి హై-వాల్యూ రంగాల్లో లక్షలాది కొత్త ఉద్యోగాలు ల‌భిస్తాయి.
దీని ఫలితంగా యూనివర్సిటీలు తమ కోర్సులను మార్చుకుని, పరిశ్రమ అవసరాలకు అనుగుణంగా యువతకు అత్యాధునిక నైపుణ్యాలను నేర్పిస్తాయి. మరో ముఖ్యమైన ప్రభావం ఏమిటంటే, ముంబై, బెంగళూరు వంటి నగరాలకు వలస వెళ్లిన టెక్ నిపుణులు తిరిగి తమ సొంత రాష్ట్రాలకు వచ్చి పనిచేసేందుకు ఈ కొత్త టెక్ హబ్‌లు అవకాశం ఇస్తున్నాయి.
ఈ టెక్నాలజీ పెట్టుబడులు ప్రస్తుత అవసరాలను తీర్చడమే కాకుండా, భవిష్యత్తులో భారతదేశాన్ని గ్లోబల్ టెక్నాలజీ రంగంలో అగ్రగామిగా నిలపడానికి బలమైన పునాదిని సిద్ధం చేస్తున్నాయి. అరట్టై వంటి దేశీయ ప్రయత్నాలు, దక్షిణాది రాష్ట్రాల టెక్ హబ్స్‌గా ఎదుగుదల… ఈ రెండు పరిణామాలు భారతీయ డిజిటల్ విప్లవంలో ఆధిపత్యాన్ని స్పష్టం చేస్తున్నాయి.
