WPL 2025 Finals | మ‌రోసారి టైటిల్ ను ముద్దాడిన ముంబై !

  • పోరాడి ఓడిన ఢిల్లి కేపిటల్స్‌

డ‌బ్ల్యూపీఎల్ మాజీ ఛాంపియన్ ముంబై… మరోసారి ఛాంపియన్‌గా అవ‌త‌రించింది. మహిళల ప్రీమియర్ లీగ్ 2025 టైటిల్‌ను ముంబై ఇండియన్స్‌ జట్టు కైవసం చేసుకుంది. ఈరోజు జరిగిన ఫైన‌ల్ ఫైట్ లో ఢిల్లీ క్యాపిటల్స్ మహిళల‌ జట్టును మ‌ట్టిక‌రిపించిన హర్మన్‌ప్రీత్ సేన మరోసారి టైటిల్‌ను ముద్దాడింది.

అయితే, వరుసగా మూడో సీజన్‌లోనూ ఫైనల్‌కు చేరుకున్న ఢిల్లీ జట్టును దురదృష్టం వెంటాడింది. ఫైన‌ల్ పోరులో ఆఖ‌రి వ‌రకూ పోరాడిన ఢిల్లీ.. ముంబై చేతిలో 8 పరుగుల తేడాతో ఓడిపోయి తృటిలో టైటిల్‌ను చేజార్చుకుంది.

కాగా, నేటి మ్యాచ్ లో టాస్ ఓడి తొలుత బ్యాటింగ్ చేప‌ట్టిన హ‌ర్మ‌న్ ప్రీత్ సేన‌… నిర్ణీత ఓవ‌ర్ల‌లో 7 వికెట్ల న‌ష్టానికి 149 ప‌రుగుల సాధించింది. ఓపెనర్లు యస్టిక భాటియా (8), హేలీ క్రిస్టెన్ మాథ్యూస్ (3) విఫలం కాగా, వన్‌డౌన్‌లో వచ్చిన నాట్ స్కైవర్-బ్రంట్ (30), కెప్టెన్‌ హర్మన్‌ప్రీత్‌ కౌర్‌ (66) జట్టును ఆదుకున్నారు. దీంతో ముంబై ఇండియన్స్‌ జట్టు 149 పరుగులు మాత్రమే చేసింది. ఢిల్లి కేపిటల్స్‌ బౌలర్లలో జెస్‌ జొనాస్‌సేన్‌, మరిజన్నె కప్‌, శ్రీ చరణి రెండేసి వికెట్లు పడగొట్టారు.

అనంతరం 150 పరుగుల టార్గెట్ తో టైటిలే ల‌క్ష్యంగా బరిలోకి దిగిన ఢిల్లి కేపిటల్స్‌ ఆరంభం నుంచి తడబడింది. ఓపెనర్‌గా బరిలోకి కెప్టెన్‌ మెగ్‌ లన్నింగ్ (13) పరుగులకే వెనుదిరగ్గా, మరో ఓపెనర్‌ షఫాలీ వర్మ (4) వికెట్లు ముందు దొరికిపోయింది. వన్‌డౌన్‌లో వచ్చిన జెస్‌ జొనాస్‌సేన్‌ (13) నిరుత్సాహపరిచింది. జమిమా రోడ్రిగ్యూస్ (30) పెవిలియన్‌ చేరింది. మిడిలార్డర్‌ బ్యాటర్లు అంతగా రాణించలేకపోయారు.

ఇక ఆఖ‌ర్లో మరిజన్నె కప్ (24 బంతుల్లో 5 ఫోర్లు 2 సిక్స్‌లతో 40 పరుగులు) స్కోరు బోర్డును పరుగులెత్తించింది. మరిజన్నె త‌రువాత‌ నికి ప్రసాద్ (25) ఒంటరి పోరాటం చేసినా ఫలితం లేకుండా పోయింది. ముంబై మౌలర్ల ధాటికి ఢిల్లీ జ‌ట్టు నిర్ణీత 20 ఓవర్లలో 9 వికెట్లు కోల్పోయి 141 పరుగులకే పరిమితమైంది. దీంతో 8 పరుగుల తేడాతో గెలుపొందిన ముంబై ఇండియ‌న్స్.. మరోసారి డ‌బ్ల్యూపీఎల్ టైటిల్ ను ఎగురేసుకుపోయింది.

కాగా, ముంబై ఇండియన్స్‌ బౌలర్లలో స్కివర్‌-బ్రంట్‌ 3 వికెట్లు పడగొట్టగా, అమెలియా కెర్‌ 2 వికెట్లు తీశారు. జట్టు విజయంలో అటు బ్యాట్‌తో, ఇటు బంతితో సత్తాచాటిన స్కివర్‌-బ్రంట్‌కు ప్లేయర్‌ ఆఫ్‌ ది మ్యాచ్‌ పురస్కారం లభించింది.

Leave a Reply