తెలంగాణలోని భూపాలపల్లి జిల్లాలోని సరస్వతీ పుష్కరాలపై మంత్రి కొండా సురేఖ సమీక్ష నిర్వ‌హించారు. జిల్లాలోని కాళేశ్వరం త్రివేణి సంగమం వద్ద ప్రవహించే “అంతర్వాహిని” సరస్వతి నది పుష్కరాలకు పటిష్ట ఏర్పాట్లు చేయాలని జిల్లా యంత్రాంగాన్ని ఆదేశించారు.
ఈరోజు (మంగళవారం) హైదరాబాద్ సచివాలయంలో మంత్రి కొండా సురేఖ ఆధ్వర్యంలో కాళేశ్వరం సరస్వతి పుష్కరాలపై సమీక్ష హైదరాబాద్‌లో జరిగింది. మే 15వ తేదీ నుంచి 26వ తేదీ వరకు జరగనున్న ఈ త్రివేణి సంగమ సరస్వతి పుష్కరానికి రాష్ట్రం నుండే కాకుండా ఇతర రాష్ట్రాల నుండి కూడా లక్షలాది మంది భక్తులు వస్తారని తెలిపారు.
ఈ మేర‌కు భక్తులకు మెరుగైన సౌకర్యాలను అందించేందుకు ప్రణాళికలపై చర్చించారు. భక్తులకు ఎక్కడా ఇబ్బందులు లేకుండా చూసుకోవాల‌ని అధికారుల‌ను ఆదేశించారు. చలువ పందిళ్లు, టెంట్‌లు, శాశ్వత మరుగుదొడ్లు ఏర్పాట్లు చేస్తున్నట్టు అధికారులు వివ‌రించారు. కాళేశ్వ‌రానికి సంబంధించిన వివ‌రాల‌న్నీ ఇప్పటికే ఏర్పాటు చేసిన వెబ్ సైట్, యాప్ ద్వారా తెలియజేయాల‌న్నారు.
బృహస్పతి మిథున రాశిలోకి (మిథున రాశి) ప్రవేశించినప్పటి నుండి 12 రోజుల పాటు సరస్వతి నది పుష్కరాలు జరుపుకుంటామని, తెలంగాణ ప్రత్యేక రాష్ట్రం ఏర్పడిన తర్వాత తొలిసారిగా సరస్వతి పుష్కరాలు జరగనున్నాయని మంత్రి కొండాసురేఖ తెలిపారు.
మే14న రాత్రి 10.35 గంటలకు బృహస్పతి మిథునరాశిలోకి ప్రవేశించినప్పుడు పుష్కరాలు ప్రారంభమవుతాయని, అప్పటికి అన్ని సన్నాహాలు పూర్తి చేయాలని తెలిపారు. మరుసటి రోజు సూర్యోదయం నుండి పుష్కర పూజ స్నానం ఆచరించాల్సి ఉంటుందని గుర్తు చేశారు.
మహాబలిపురం నుంచి వచ్చిన సరస్వతీ దేవి విగ్రహ ప్రతిష్ఠా పనుల పురోగతిని సమీక్షించారు. ఇక దేవాదాయ శాఖ, జిల్లా యంత్రాంగం, ఆలయ అధికారులు, అర్చకులు, సలహా బోర్డుతో సమన్వయంగా పుష్కరాల ఏర్పాట్లను వేగవంతం చేయాలని సూచించారు. ఈ సమావేశంలో మంత్రి శ్రీధర్ బాబు కూడా పాల్గొని, పుష్కరాలను విజయవంతంగా నిర్వహించేందుకు అవసరమైన సూచనలు చేశారు.
