ఆసియా కప్ టీ20 2025 టోర్నమెంట్‌లో భారత జట్టు తమ తొలి మ్యాచ్‌లోనే రికార్డు విజయం సాధించింది. ఆతిథ్య యునైటెడ్ అరబ్ ఎమిరేట్స్ (UAE) పై 9 వికెట్ల తేడాతో ఘన విజయం సాధించి, టోర్నీని విజయంతో ప్రారంభించింది. ఈ అద్భుతమైన విజయంలో భారత బౌలర్లు, బ్యాట్స్‌మెన్ సమష్టిగా రాణించారు.
బౌలింగ్ దండయాత్ర.. కుప్పకూలిన యూఏఈ
టాస్ గెలిచిన భారత కెప్టెన్ బౌలింగ్ ఎంచుకోగా.. కొత్త బంతితో భారత్ బౌలర్లు యూఏఈ బ్యాటర్లను ఉక్కిరిబిక్కిరి చేశారు. దీ్తో, 57 పరుగులకే యూఏఈ ఆలౌట్ అయింది. యూఏఈ బ్యాట‌ర్ల‌లో అలీషాన్ షరఫు (22), ముహమ్మద్ వసీమ్ (19) మాత్రమే రెండంకెల స్కోరు సాధించగలిగారు.
స్పిన్నర్లు కుల్దీప్ యాదవ్, శివమ్ దూబే తమ మాయాజాలంతో యూఏఈ బ్యాటర్లను పెవిలియన్ చేర్చారు. కుల్దీప్ యాదవ్ (2.1 ఓవర్లలో 7 పరుగులిచ్చి 4 వికెట్లు), శివమ్ దూబే (2 ఓవర్లలో 4 పరుగులిచ్చి 3 వికెట్లు), వరుణ్ చక్రవర్తి (2 ఓవర్లలో 4 పరుగులిచ్చి 1 వికెట్) అద్భుత ప్రదర్శన చేశారు. కేవలం 13.1 ఓవర్లలోనే యూఏఈ ఇన్నింగ్స్ ముగిసిందంటే భారత బౌలింగ్ ఏ స్థాయిలో ఉందో అర్థం చేసుకోవచ్చు.
బ్యాటింగ్ విజృంభణ…
విజయానికి 58 పరుగులు కావాల్సిన లక్ష్యంతో బరిలోకి దిగిన భారత జట్టు, కేవలం 4.3 ఓవర్లలోనే లక్ష్యాన్ని ఛేదించి చరిత్ర సృష్టించింది. ఓపెనర్లు అభిషేక్ శర్మ, వైస్ కెప్టెన్ శుభ్‌మన్ గిల్ దూకుడుగా ఆడి భారత్‌కు ఘన విజయాన్ని అందించారు.
ఓపెనర్ అభిషేక్ శర్మ తొలి బంతికే సిక్స్ కొట్టి భారత ఇన్నింగ్స్‌కు ఘనమైన ఆరంభాన్ని ఇచ్చాడు. కేవలం 16 బంతుల్లో 30 పరుగులు చేసిన మెరుపు ఇన్నింగ్స్ ఆడాడు. శర్మ అవుట్ అయిన వెంటనే బ్యాటింగ్‌కు వచ్చిన సూర్యకుమార్ యాదవ్ కూడా తాను ఎదుర్కొన్న మొదటి బంతిని సిక్స్‌గా మలిచి ప్రేక్షకులను అలరించాడు.
మరోవైపు, ఓపెనర్‌గా బరిలోకి దిగిన శుభ్‌మన్ గిల్ కూడా అద్భుతంగా రాణించాడు. 9 బంతుల్లో 20 పరుగులు చేసి, జట్టును విజయానికి దగ్గరగా తీసుకెళ్లాడు. చివరికి, గిల్ బౌండరీ కొట్టి మ్యాచ్‌ను ముగించి, భారత్‌కు భారీ విజయాన్ని అందించాడు. ఇంకా 93 బంతులు మిగిలి ఉండగానే భారత్ ఈ విజయాన్ని సొంతం చేసుకుంది.
ఈ విజయం భారత జట్టుకు ఆసియా కప్ టోర్నమెంట్‌లో శుభారంభాన్ని ఇచ్చింది. ఇప్పుడు భారత అభిమానుల దృష్టి ఆదివారం జరగనున్న చిరకాల ప్రత్యర్థి పాకిస్థాన్‌తో జరగనున్న మ్యాచ్ పై ఉంది.
