Rs.207cr | దివ్యాంగులకు ఆత్మవిశ్వాసం నింపే ‘దివ్యాంగ శక్తి‘

Rs.207cr | దివ్యాంగులకు ఆత్మవిశ్వాసం నింపే ‘దివ్యాంగ శక్తి‘

బస్సు పథకం లాంఛనంగా ప్రారంభం
దివ్యాంగులతో కలిసి బస్సులో ప్రయాణించిన ఎమ్మెల్యే గద్దె రామమోహన్

Rs.207cr | పడమట, ఆంధ్రప్రభ : విజయవాడ ఆటోనగర్‌లోని ఆర్టీసీ బస్టాండ్ వద్ద బుధవారం ఎమ్మెల్యే గద్దె రామమోహన్ ‘దివ్యాంగ శక్తి’ బస్సు పథకాన్ని ప్రారంభించారు. ఈ సందర్భంగా దివ్యాంగులతో ముచ్చటించి వారి యోగక్షేమాలను తెలుసుకున్నారు. పథకం ప్రారంభానంతరం ఆటోనగర్ బస్టాండ్ నుంచి తాడిగడప వరకు దివ్యాంగులతో కలిసి ప్రత్యేకంగా ప్రారంభించిన బస్సులో ఎమ్మెల్యే ప్రయాణం చేసి వారికి ఉత్సాహం నింపారు., ఈ సందర్బంగా ఎమ్మెల్యే గద్దె రామమోహన్ మాట్లాడుతూ దివ్యాంగులకు ఉచిత ప్రయాణ సౌకర్యం కల్పించే లక్ష్యంతో కూటమి ప్రభుత్వం ‘దివ్యాంగ శక్తి’ పథకాన్ని అమలు చేస్తుందన్నారు.

ఈ పథకం ద్వారా దివ్యాంగుల ప్రయాణాన్ని సులభతరం చేస్తూ వారిలో ఆత్మవిశ్వాసాన్ని పెంపొందించే దిశగా ప్రభుత్వం ముందడుగు వేసిందన్నారు. ఈ పథకం కింద ఏపీఎస్ఆర్టీసీ నిర్వహిస్తున్న సిటీ ఆర్డినరీ, మెట్రో ఎక్స్‌ప్రెస్, పల్లెవెలుగు, అల్ట్రా పల్లెవెలుగు, ఎక్స్‌ప్రెస్ బస్సుల్లో దివ్యాంగులకు ఉచిత ప్రయాణం కల్పించడం జరిగిందన్నారు. మొత్తం 21 కేటగిరీలలో 40 శాతం కంటే ఎక్కువ వైకల్యం ఉన్న దివ్యాంగులు ఈ పథకానికి అర్హులన్నారు. దివ్యాంగులతో పాటు వారి సహాయకులను కూడా పరిగణనలోకి తీసుకుని సుమారు 12.76 లక్షల మంది లబ్దిదారులకు నారా చంద్రబాబు నాయుడు నేతృత్వంలోని కూటమి ప్రభుత్వం ప్రయోజనం కల్పించిందన్నారు.

ఇందుకోసం ప్రభుత్వం ఏటా సుమారు రూ.207 కోట్ల వ్యయాన్ని భరిస్తోందన్నారు. ఆర్టీసీ అధికారుల కూడా దివ్యాంగులకు అన్ని విధాలుగా సహకరించాలని సూచించారు. దివ్యాంగుల సంక్షేమం కోసం కూటమి ప్రభుత్వం ఎల్లప్పుడూ అండగా ఉంటుందని ఆయన స్పష్టం చేశారు. ఈ పధకాన్ని ప్రారంభించిన ముఖ్యమంత్రి చంద్రబాబుకు, ఉపముఖ్యమంత్రి పవన్ కళ్యాణ్ కు గద్దె రామమోహన్ దివ్యాంగుల తరఫున కృతజ్ఞతలు తెలియజేశారు. ఈ కార్యక్రమంలో పేరేపి ఈశ్వర్, పొట్లూరి రవీంద్ర, డిపో మేనేజర్ జి.రాజేష్, అసిస్టెంట్ మేనేజర్ రాంబాబు, అసిస్టెంట్ మెకానికల్ ఇంజనీర్ కె.శ్రీనివాస్, శంకర్, మణి, మోహన్, పితాని తదితరులు ఉన్నారు.