హైద‌రాబాద్ – కళ్యాణ లక్ష్మీ, షాదీ ముబారక్ కింద తులం బంగారం ఇచ్చే హామీని అమలు చేయాలని కోరుతూ వినూత్నంగా శాసనమండలి ఆవరణలో బీఆర్ఎస్ ఎమ్మెల్సీల నిరసన చేశారు. తక్షణమే తులం బంగారం ఇవ్వాలని పెద్ద ఎత్తున నినాదాలు చేశారు. బంగారు కడ్డీలను పోలిన వాటిని ప్రదర్శిస్తూ ప్రభుత్వానికి వ్యతిరేకంగా నినాదాలు తెలిపారు. ఇప్పటి వరకు పెళ్లైన వారికి కూడా తులం బంగారం ఇవ్వాల్సిందేనని డిమాండ్ చేశారు.
ఈ సంద‌ర్బంగా మాట్లాడుతూ.. నిరుపేదలు ఆడబిడ్డ పెళ్లి చేసేందుకు ఇబ్బందులు పడకూడదనే.. కేసీఆర్ కళ్యాణలక్ష్మి , షాదీ ముబారక్ పథకాల ద్వారా రూ.లక్షపైకు పైనే ఆర్థిక సాయం చేశారని గుర్తు చేశారు. రాష్ట్రంలో అధికారంలోకి రావడం కోసం కాంగ్రెస్ నేతలు తులం బంగారం ఇస్తామని హామీ ఇచ్చారని.. నేడు అధికారంలోకి రాగానే ఆ విషయంపై విస్మరించారని ఫైర్ అయ్యారు. ప్రతి మహిళకు నెలకు రూ.2,500 ఖాతాల్లో జమ చేస్తామని మాయ మాటలు చెప్పారని ధ్వజమెత్తారు. ఇచ్చిన హామీలను వెంటనే అమలు చేయాలని.. లేని పక్షంలో రాష్ట్ర వ్యాప్తంగా నిరసనలకు దిగుతామని బీఆర్ఎస్ ఎమ్మెల్సీ హెచ్చరించారు.లం బంగారం కోసం ఆడ పిల్లల తల్లిదండ్రులు ఎదురుచూస్తున్నారని బీఆర్ఎస్ ఎమ్మెల్సీలు పేర్కొన్నారు.
ఇక, శాసన మండలిలో బీఆర్ఎస్ ప్రతిపక్ష నేత మధుసూదన చారి మాట్లాడుతూ.. కాంగ్రెస్ పార్టీ అధికారంలోకి రావడానికి అనేక హామీలు ఇచ్చారు.. కేసీఆర్ ప్రభుత్వం ఆడ పిల్లలకు కళ్యాణ లక్ష్మీ కింద లక్ష రూపాయల స్కీం ప్రవేశ పెట్టారు.. అనేక వర్గాల ప్రజలను ఆదుకున్నారు కేసీఆర్.. కాంగ్రెస్ ప్రభుత్వం మహిళా లోకానికి తీవ్ర మనస్తాపానికి గురి చేసింది.. తులం బంగారం ఇవ్వలేదు, నెలకు 2500 ఇవ్వలేదు.. కాంగ్రెస్ పార్టీ మహిళా లోకాన్ని మోసం చేసింది.. సెంటిమెంట్ ఉపయోగించి నమ్మించి మోసం చేశారు.. తెలంగాణలో దుర్మార్గపు పాలన నడుస్తుంది అని మండిపడ్డారు. కాంగ్రెస్ పార్టీ తక్షణమే పెళ్లైన అమ్మాయిలకు తులం బంగారం ఇవ్వాలని డిమాండ్ చేస్తున్నాం.. మాయమాటలు చెప్పి అధికారంలోకి వచ్చిన రేవంత్ రెడ్డికి మహిళా లోకం బుద్ధి చెబుతారు.. ప్రియాంక గాంధీ, రాహుల్ గాంధీ తెలంగాణకు వచ్చి ఇచ్చిన హామీలు అమలయ్యేలా చూడాలి అని కోరారు
