- పట్టించుకోని ఆఫీసర్లు
- పోలవరం నిర్వాసితుల ఆగ్రహం
- గేటును నెట్టేసి దూసుకెళ్ళిన ఆదివాసీలు
- చలించిన జిల్లా కలెక్టర్ .. నిర్వాసితులతో భేటీ
ఆంధ్రప్రభ, చింతూరు, (ఏఎస్‌ఆర్‌ జిల్లా) : పోలవరం నిర్వాసితుల ధర్నాతో బుధవారం అల్లూరి సీతారామరాజు జిల్లా చింతూరు ఐటీడీఏ దద్దరిల్లింది. ఈ మూడు నెలల్లో 8 సార్లు వచ్చిన వరదలతో విసిగిపోయిన చింతూరు, వీఆర్‌ పురం మండలాల్లోని రామవరం, ఏజీ కోడేరు గ్రామ పంచాయతీలలోని రామవరం, అడవి వెంకన్నగూడెం, శబరి రాయిగూడెం, సోముల గూడెం, రామవరం పాడు, చోప్పల్లి, కోప్పల్లి, గుర్రంపేట మల్లేతోట గ్రామాలకు చెందిన ప్రజలు స్వచ్ఛందంగా ఐటీడీఏ ఎదుట అందోళనకు దిగారు.
ఈ సందర్భంగా ముందుగా ఆయా గ్రామాల్లో నిర్వాసితులు భారీ ర్యాలీ నిర్వహించి వాహనాల మీద చింతూరుకి చేరుకున్నారు. అక్కడ నుండి ఎర్రంపేటలోని ఐటీడీఏ వరకు నినాదాలతో భారీ ర్యాలీ నిర్వహించారు. ఐటీడీఏ కార్యాలయం ఎదుట బైఠాయించి అందోళనకు దిగారు. ఉదయం 11 గంటలకు ప్రారంభమైన అందోళన మధ్యహ్నాం 1.25 వరకు మండుటెండలో మలమలమాడారు. అయినా అధికారులు స్పందించకపోవడంతో అందోళనకారుల అగ్రహాం కట్టలు తెంచుకుంది.
అధికారులతో తీరుతో అగ్రహానికి గురైనా ఆదివాసీలు చింతూరు ఐటీడీఏ కార్యాలయ గేటును నెట్టేసి ఐటీడీఏ కార్యాలయంలోకి అందోళనకారులు దూసుకెళ్ళారు. అందోళనకారులను పోలీసులు అడ్డుకునే ప్రయత్నం చేయడంతో నిరసనకారులు ఒక్కసారిగా గేటును నెట్టి లొపలికి దూసుకురావడంతో ఉద్రిక్తత పరిస్థితులు నెలకొన్నాయి.
పునరావాసం కల్పించండి
పోలవరం ప్రాజెక్ట్‌ నిర్మాణంతో మా ప్రాంతాలని ప్రతి ఏడాది ముంపునకు గురై ముప్పు తిప్పలు పడుతున్నామని, ఈ ప్రాంతంలో మేముకింకా ఉండలేమని తక్షణమే పరిహారం ఇచ్చి పునరావాసం కల్పిస్తే వెంటనే ఇక్కడ నుండి వెళ్ళిపోతామని నిర్వాసితులు ముక్తకంఠంతో మొత్తుకున్నారు. ఈ ఏడాది 8 సార్లు వచ్చిన వరదలతో విసిగిపోవడంతో పాటు తీవ్రంగా నష్టపోయామని, మా పరిస్థితి దయనీయంగా ఉందని వాపోయారు. ప్రభుత్వం తక్షణమే ముంపు ప్రాంతాల ప్రజలకు, పంట నష్టపరిహారం ఇవ్వాలని డిమాండ్‌ చేశారు. పేద వారికి కూలీ చేసుకునేందుకు కూలీ పనులు దొరకక పొట్టగడవడం లేదని వాపోయారు.
చలించిన కలెక్టర్
చింతూరు ఐటీడీఏ ఎదుట అందోళనకు దిగిన నిర్వాసితుల వద్దకు జిల్లా కలెక్టర్ దినేష్‌ కుమార్‌ వచ్చి నిర్వాసితుల సమస్యలను అడిగి తెలుసుకున్నారు. ఈ సందర్భంగా నిర్వాసితులుకలెక్టర్‌ దృష్టికి అనేక డిమాండ్స్‌ తీసుకెళ్ళారు. పోలవరం 2013 భూసేకరణ చట్టం క్రారం నిర్వాసితులకు నష్టపరిహారం తక్షణమే ఇవ్వాలని, రామవరం-104, గుర్రంపేట-190, ఏవీ గూడెం-14, నూతిగూడెం-86, ఉలుమూరు-54, ఏజీ కోడేరు – 28 కుటుంబాలను వదిలేశారని వారిని ముంపులో చేర్చాలని, అదేవిధంగా తోటపల్లి, చిన్నమట్టపల్లి, అన్నవరం, పెద్దమట్టపల్లి గ్రామాలని సైతం పోలవరం ముంపు జాబితాలో చేర్చడంతో పాటు పరిహారం ఇచ్చి పునరావాసం కల్పించాలని డిమాండ్‌ చేశారు.
ఆర్‌ అండ్‌ ఆర్‌ ప్యాకేజీ రూ. 10 లక్షలు ఇవ్వాలని, నిర్వాసిత గ్రామాల్లో కటాప్‌ తేదీతో సంబంధం లేకుండా ప్రభుత్వం తరలించే నాటికి 18 ఏళ్లు నిండిన యువతి, యువకులకు ఆర్‌అండ్‌ఆర్‌ ప్యాకేజీ వర్తింపజేయాలని, 2013 భూసేకరణ చట్ట ప్రకారం డి-ఫారం పట్టా భూములకు రూ. 10 లక్షల 80 వేలు చెల్లించడంతో పాటు నిర్వాసితులకు ఇంటి నిర్మాణాన్ని 5 సెంట్లు నుండి 10 సెంట్లు వరకు పెంచి ఇవ్వాలని, భూమి లేని నిరుపేద నిర్వాసిత కుటుంబానికి ప్రభుత్వం 1 ఎకరం భూమి కేటాయించాలని, ప్రతి నిర్వాసిత కుటుంబం నుండి చదువుకున్న యువతి, యువకులకు ప్రభుత్వం కల్పించాలని, పోలవరం నిర్వాసిత పునరావాస కాలనీలో 27 రకాల మౌళిక సదుపాయాలు కల్పించాలని కోరారు.
నిర్వాసిత కుటుంబాలను ఏప్రాంతంలో తరలిస్తున్నారో ఆ ప్రాంతంలో స్థానికత కల్పించాలని, నిర్వాసితులను తరలించే వరకు ప్రభుత్వ పథకాలు అమలు చేయడంతో పాటు అభివృద్ది పనులు చేపట్టాలని డిమాండ్‌ చేశారు. ఈ కార్యక్రమంలో సుమారు 2 వేలకు పైగా నిర్వాసితులు పాల్గొన్నారు. నిర్వాసితుల సమస్యలను సానుకూలంగా విన్న జిల్లా కలెక్టర్ ప్రతి సమస్యను ప్రభుత్వం దృష్ఠికి తీసుకెళ్ళ పరిష్కారానికి కృషి చేస్తానని నిర్వాసితులకు హామీ ఇచ్చారు.
