భూదాన్ మోసగాళ్లపై కఠిన చర్యలు… పీడీ యాక్ట్కు సిద్ధం
భూదాన్ మోసగాళ్లపై కఠిన చర్యలు… పీడీ యాక్ట్కు సిద్ధం
బాధితులకు ఏసీపీ భరోసా… “ఎవరినీ వదలం”
అక్రమార్కులపై ఉక్కుపాదం… గ్యాంగ్ అరెస్టులు
నకిలీ రసీదులతో కోట్ల మోసం వెలుగులోకి
మూడు బ్యాంక్ ఖాతాలు ఫ్రీజ్… లావాదేవీలపై నిఘా
ఖమ్మం ఏసీపీ రమణ మూర్తి..
ప్రత్యేక బృందాలతో దర్యాప్తు వేగవంతం
ఖమ్మం, ఆంధ్రప్రభ : ఖమ్మం టౌన్ ఏసీపీ రమణమూర్తి భూదాన్ మోసంపై తీవ్రంగా స్పందించారు. బాధితులను కలిసిన ఆయన వారికి పూర్తి భరోసా ఇచ్చారు. “అమాయకులను మోసం చేసిన వారిని ఎట్టి పరిస్థితుల్లోనూ వదలము” అని స్పష్టం చేశారు. మంగళవారం నగరంలో ఆయన మీడియాలో మాట్లాడారు. అవసరమైతే పీడీ యాక్ట్ కింద కూడా కేసులు నమోదు చేస్తామని హెచ్చరించారు. ఇప్పటికే కొందరు నిందితులను అరెస్టు చేసి జ్యుడీషియల్ రిమాండ్కు పంపినట్లు తెలిపారు. ఈ కేసును అత్యంత ప్రాధాన్యంగా తీసుకుని విచారణ కొనసాగిస్తున్నామని పేర్కొన్నారు.
భూదాన్ పేరుతో గ్యాంగ్ మోసం..
ఏసీపీ వెల్లడించిన వివరాల ప్రకారం, నిందితులు గ్యాంగ్గా ఏర్పడి భూదాన్ భూములను అమ్మకానికి చూపించారు. తాము ఓపిడిఆర్ సభ్యులమని చెప్పి ప్రజలను నమ్మించారు. వెలుగుమట్ల రెవెన్యూ పరిధిలోని భూములను లక్ష్యంగా చేసుకున్నారు. ఇల్లు లేని అమాయకులను ప్రలోభపెట్టి పెద్ద మొత్తంలో డబ్బులు వసూలు చేశారు. ఒక్కో బాధితుడి నుంచి మూడు నుంచి మూడున్నర లక్షల వరకు తీసుకున్నట్లు తేలింది. ఈ మోసంలో పలువురు బాధితులు చిక్కుకున్నట్లు పోలీసులు గుర్తించారు.
నకిలీ రసీదులు… పక్కా ప్లాన్…
భూదాన్ వినోబా భావే వెల్ఫేర్ సొసైటీ, యూసీసీఆర్ఐ (ఎంఎల్) పార్టీ పేర్లతో నకిలీ రసీదులు ముద్రించినట్లు పోలీసులు గుర్తించారు. పి. అరవింద్ పేరుతో ఈ రసీదులను జారీ చేసి నమ్మకం కల్పించారు. ఫ్లెక్సీలు, ప్రచారంతో ప్రజలను ఆకర్షించినట్లు వెల్లడైంది. బాధితుల వద్ద ఉన్న రసీదులను పోలీసులు స్వాధీనం చేసుకుని పరిశీలిస్తున్నారు. ఈ వ్యవహారం ముందుగానే ప్రణాళికాబద్ధంగా నిర్వహించినట్లు అనుమానం వ్యక్తమవుతోంది. అమాయకులను లక్ష్యంగా చేసుకుని ఈ మోసం చేసినట్లు ఏసీపీ తెలిపారు.
బ్యాంక్ ఖాతాలు ఫ్రీజ్… దర్యాప్తు ముమ్మరం…
మోసపూరితంగా సేకరించిన డబ్బును నిందితులు వివిధ బ్యాంక్ ఖాతాల ద్వారా లావాదేవీలు జరిపినట్లు గుర్తించారు. ఈ నేపథ్యంలో మూడు బ్యాంక్ ఖాతాలను ఇప్పటికే ఫ్రీజ్ చేసినట్లు ఏసీపీ తెలిపారు. మరిన్ని ఖాతాలపై కూడా నిఘా ఉంచినట్లు చెప్పారు. డబ్బు మార్గాలను ట్రాక్ చేస్తూ విచారణ కొనసాగుతోంది. ఈ డబ్బును వ్యక్తిగత అవసరాలకు వినియోగించినట్లు అనుమానిస్తున్నారు. ఆర్థిక లావాదేవీలపై ప్రత్యేక దృష్టి పెట్టినట్లు వెల్లడించారు.
ప్రత్యేక బృందాలతో గాలింపు… మరిన్ని అరెస్టులు…
ఈ కేసులో మిగిలిన నిందితులను పట్టుకునేందుకు ప్రత్యేక బృందాలు పనిచేస్తున్నాయి. ఇప్పటికే కొందరిని అదుపులోకి తీసుకుని విచారిస్తున్నారు. భూదాన్ భూముల్లో స్థలాలు ఇస్తామని చెప్పి మరిన్ని ప్రాంతాల్లో కూడా మోసాలు జరిగాయా అనే కోణంలో దర్యాప్తు కొనసాగుతోంది. ప్రజలు ఇలాంటి మోసాలకు గురికాకుండా జాగ్రత్తగా ఉండాలని ఏసీపీ సూచించారు. భూముల కొనుగోలు ముందు పూర్తి స్థాయి ధృవీకరణ చేసుకోవాలని హెచ్చరించారు. అక్రమార్కులపై కఠిన చర్యలు కొనసాగుతాయని స్పష్టం చేశారు. ఈ సమావేశంలో సీఐ భానుప్రకాష్ తదితరులు పాల్గొన్నారు.
