జూలూరుపాడు, ఆంధ్రప్రభ : కాంగ్రెస్ పార్టీ పక్షాన గ్రామ పంచాయతీ సర్పంచ్, వార్డు సభ్యులుగా ఎన్నికల బరిలో నిలిచిన అభ్యర్థులను గెలిపించాలని వైరా నియోజకవర్గం ఎమ్మెల్యే మలోత్ రాందాస్ నాయక్ పిలుపునిచ్చారు. శుక్రవారం భద్రాద్రి కొత్తగూడెం జిల్లా జూలూరుపాడు మండలంలోని స్థానిక సంస్థల ఎన్నికల్లో పోటీ చేస్తున్న కాంగ్రెస్ అభ్యర్థుల విజయాన్ని కాంక్షిస్తూ ఎమ్మెల్యే రాందాస్ నాయక్ ఎన్నికల ప్రచారంలో పాల్గొన్నారు.
సూరారం, అనంతారం, గాంధీనగర్, వెంగన్నపాలెం, మాచినేని పేట తండా, కొమ్ముగూడెం గ్రామ పంచాయతీల్లో ఎమ్మెల్యే విస్తృతంగా ఎన్నికల ప్రచారం నిర్వహించారు.
ఈ సందర్భంలో రాందాస్ నాయక్ మాట్లాడుతూ, “కాంగ్రెస్ పార్టీ ప్రభుత్వం పేదల అభివృద్ధి, సంక్షేమానికి కృషి చేస్తోంది. అసెంబ్లీ ఎన్నికల్లో ఇచ్చిన హామీలను పార్టీ నెరవేర్చింది. మహిళలకు ఉచిత బస్సు ప్రయాణం, గృహ విద్యుత్ వినియోగానికి 200 యూనిట్ల ఉచిత విద్యుత్, రేషన్ కార్డు దారులకు ఉచిత సన్న బియ్యం పంపిణీ ఘనత కాంగ్రెస్ పార్టీకి మాత్రమే దక్కుతుంది. పేదలకు ఇందిరమ్మ ఇళ్ల నిర్మాణానికి 5 లక్షల రూపాయలు కేటాయించాం. మండల కేంద్రంలో పత్తి కొనుగోలు కేంద్రం అభివృద్ధికి ప్రభుత్వం నిధులు మంజూరు చేసింది, మార్చిలో నిర్మాణ పనులు ప్రారంభిస్తాం. కాటన్ మార్కెట్ అభివృద్ధి చెందితే హమాలీలకు ఉపాధి అవకాశాలు అందుతాయి. జూలూరుపాడు మండల కేంద్రం నుంచి పాపకొల్లు గ్రామానికి డబుల్ లైన్ బిటి రహదారి నిర్మాణం కోసం కృషి చేస్తున్నాం” అన్నారు.
అతని విజ్ఞప్తి, స్థానిక సంస్థల ఎన్నికల్లో కాంగ్రెస్ పార్టీ అభ్యర్థులకు ఓట్లు వేస్తూ అత్యధిక మెజార్టీతో గెలిపించాలని ప్రజలను కోరడమే.
ఈ కార్యక్రమంలో కాంగ్రెస్ పార్టీ జిల్లా నాయకులు లేళ్ళ వెంకటరెడ్డి, పార్టీ మండల అధ్యక్షులు మలోత్ మంగీలాల్ నాయక్, వెంగన్నపాలెం మాజీ ఎంపీటీసీ దుద్దుకూరి మధుసూదన్ రావు, కాంగ్రెస్ పార్టీ అభ్యర్థులు యదలపల్లి శశికళ, చింతా జగన్నాథం, కోర్స రమేష్, మంగీలాల్, లకావత్ జానకి, వేల్పుల నరసింహారావు తదితరులు పాల్గొన్నారు.
