- జిల్లా ఎస్పీ శరత్ చంద్ర పవార్
నల్గొండ (ఆంధ్రప్రభ) : పోలీస్ అమరవీరుల సంస్మరణ దినోత్సవం, పోలీసు ఫ్లాగ్ డేను పురస్కరించుకొని నల్గొండ జిల్లాలోని ఔత్సాహిక ఫోటోగ్రాఫర్ల కోసం ఫోటోగ్రఫీ, షార్ట్ ఫిల్మ్ లకు సంబంధించి తెలంగాణ రాష్ట్ర పోలీస్ శాఖ ఆధ్వర్యంలో రాష్ట్రస్థాయి పోటీలను నిర్వహిస్తున్నట్లు జిల్లా ఎస్పీ శరత్ చంద్ర పవార్ తెలిపారు.
పోలీస్ ఫ్లాగ్ డే/ పోలీసు అమరవీరుల ప్రాణత్యాగాలను స్మరిస్తూ ఈ నెల అక్టోబర్ 21 నుంచి 31 వరకు నిర్వహించనున్న వారోత్సవాలలో భాగంగా ఈ పోటీలు జరుగుతున్నాయని అన్నారు. అత్యవసర సమయాల్లో పోలీసులు స్పందన, ప్రకృతి వైపరీత్యాల్లో పోలీసుల సేవ, ఇతర సందర్భాల్లో పోలీసుల కీర్తి ప్రతిష్ఠలను పెంపొందించే అంశాలకు సంబంధించిన రచనలను పంపవచ్చు అని తెలిపారు.
పోటీల కోసం గత సంవత్సరం (2024) అక్టోబర్ నుండి ప్రస్తుత సంవత్సరం (2025) అక్టోబర్ నెల ఇప్పటి వరకు తీసిన 3 ఫోటోలు, తక్కువ నిడివి (3 నిమిషాలు) గల షార్ట్ ఫిల్మ్ లను మాత్రమే నామినేషన్లకు పంపించాల్సి ఉంటుందన్నారు.
షార్ట్ ఫిల్మ్ లోడ్ చేసిన పెన్ డ్రైవ్, 10 x 8 సైజులో తీసిన 3 ఫోటోలు, వాటి సాఫ్ట్ కాపీలను పెన్ డ్రైవ్లో రాష్ట్రస్థాయి పోటీల కోసం ఈ నెల 23వ తేదీలోపు జిల్లా పోలీస్ కార్యాలయంలోని ఐటీ కోర్ సెక్షన్ విభాగంలో అందజేయాలని ఆయన కోరారు.
