HDFC Bank | బ్యాంకు ముందు పార్కు చేసిన బైక్ చోరి..
HDFC Bank | బ్యాంకు ముందు పార్కు చేసిన బైక్ చోరి..
పోలీసులను ఆశ్రయించిన బాధితుడు
HDFC Bank | చిలకలూరిపేట టౌన్, ఆంధ్రప్రభ : చిలకలూరిపేట పట్టణంలో దుండగుల దుస్సాహసం కలకలం రేపింది. కేబీ రోడ్లోని HDFC Bank శాఖ ముందు పార్క్ చేసిన బైక్ను గుర్తుతెలియని వ్యక్తి దొంగిలించిన ఘటన బుధవారం వెలుగుచూసింది. ఈ సంఘటనకు సంబంధించిన సీసీటీవీ దృశ్యాలు బయటకు రావడంతో పట్టణంలో ఆందోళన వాతావరణం నెలకొంది. పట్టణంలోని హెచ్డీఎఫ్సీ బ్యాంకు శాఖకు ఒక ఖాతాదారుడు ఆర్థిక లావాదేవీల నిమిత్తం బుధవారం ఉదయం వచ్చారు.
బ్యాంకు ముందు తన ద్విచక్ర వాహనాన్ని లాక్ చేసి లోపలికి వెళ్లారు. కొద్ది సేపటికి బయటకు వచ్చి చూడగా బైక్ కనిపించకపోవడంతో షాక్కు గురయ్యారు.వెంటనే పరిసర ప్రాంతాల్లో వెతికినా ఫలితం లేకపోవడంతో బ్యాంకు సిబ్బందికి సమాచారం ఇచ్చారు. బ్యాంకులో అమర్చిన సీసీటీవీ కెమెరాలను పరిశీలించగా, ఒక గుర్తుతెలియని వ్యక్తి నిశితంగా పరిసరాలను గమనించి, క్షణాల్లో బైక్ను తీసుకెళ్లిన దృశ్యాలు రికార్డు అయినట్లు తెలుస్తోంది.
సీసీటీవీ దృశ్యాలు కలకలం…
సీసీటీవీ ఫుటేజ్లో దుండగుడు ప్రశాంతంగా వచ్చి, ముందుగా చుట్టుపక్కల పరిస్థితిని పరిశీలించి, తరువాత బైక్ను స్టార్ట్ చేసి వేగంగా అక్కడి నుంచి వెళ్లిపోయినట్లు కనిపిస్తోంది. ఈ దృశ్యాలు సోషల్ మీడియాలో చక్కర్లు కొడుతుండటంతో పట్టణవాసుల్లో ఆందోళన నెలకొంది. బాధితుడు వెంటనే పట్టణ పోలీస్ స్టేషన్లో ఫిర్యాదు చేశారు. కేసు నమోదు చేసిన పోలీసులు సీసీటీవీ ఫుటేజ్ ఆధారంగా దర్యాప్తు ప్రారంభించారు.
అనుమానితుడి వివరాలు సేకరించి, పరిసర ప్రాంతాల్లోని ఇతర కెమెరాల ఫుటేజ్ కూడా పరిశీలిస్తున్నట్లు సమాచారం. త్వరలోనే నిందితుడిని పట్టుకుంటామని పోలీసులు తెలిపారు. పట్టణంలోని రద్దీ ప్రాంతంలో, బ్యాంకు వంటి ప్రాధాన్యత గల సంస్థ ముందు ఇలాంటి దొంగతనం జరగడం పట్ల స్థానికులు ఆందోళన వ్యక్తం చేస్తున్నారు.
ఇటీవల పట్టణంలో వాహన దొంగతనాలు పెరుగుతున్నాయనే అభిప్రాయాలు వ్యక్తమవుతున్నాయి. పోలీసులు రాత్రి గస్తీని పెంచి, ముఖ్య కూడళ్లలో ప్రత్యేక నిఘా ఏర్పాటు చేయాలని ప్రజలు కోరుతున్నారు. బ్యాంకులు, మార్కెట్లు వంటి రద్దీ ప్రదేశాల్లో వాహనాలను పార్క్ చేసే సమయంలో డబుల్ లాక్ విధానం పాటించాలి. అనుమానాస్పద వ్యక్తులు కనిపిస్తే వెంటనే పోలీసులకు సమాచారం ఇవ్వాలి. ఈ ఘటనపై దర్యాప్తు కొనసాగుతుండగా, పట్టణంలో భద్రతా చర్యలు మరింత కట్టుదిట్టం చేయాలని స్థానికులు కోరుతున్నారు.
