హైదరాబాద్, ఆంధ్ర‌ప్ర‌భ : ప్రాంతీయ అనుసంధానాన్ని మెరుగుప‌ర‌చ‌డానికి, ఆర్థికాభివృద్ధికి తోడ్పడేందుకు ఔటర్ రింగ్ రోడ్ (ORR) వద్ద రవిర్యాల్ (టాటా ఇంటర్‌చేంజ్) నుండి ప్రతిపాదిత ప్రాంతీయ రింగ్ రోడ్ (RRR) అమంగల్ (రతన్ టాటా రోడ్) వరకు గ్రీన్‌ఫీల్డ్ రేడియల్ రోడ్–1 నిర్మాణాన్ని చేపడుతోంద‌ని హెచ్ఎండీఏ కమిషనర్ సర్ఫరాజ్ అహ్మద్ తెలిపారు. తెలంగాణ ప్రభుత్వం ఈ ప్రతిష్టాత్మక ప్రాజెక్ట్‌ను నిర్ణీత సమయానికి పూర్తి చేయడానికి కట్టుబడి ఉంద‌న్నారు. పర్యావరణహిత, సుస్థిర మౌలిక వసతులను అందించడం ద్వారా ప్రాంతీయ రవాణా అవసరాలను తీర్చడానికి కృషి చేస్తుంద‌ని చెప్పారు. ఈ ప్రాజెక్ట్‌కు ముఖ్యమంత్రి రేవంత్ రెడ్డి ఈ రోజు శంకుస్థాప‌న చేసి అనంత‌రం ప్ర‌సంగిస్తారు.
ప్ర‌ధాన అంశాలు
- మొత్తం 41.50 కిలోమీట‌ర్ల గ్రీన్‌ఫీల్డ్ రేడియల్ రోడ్డు నిర్మించ‌నున్నారు.
- మొద‌టి దశలో రవిర్యాల్ టాటా ఇంటర్‌చేంజ్ (ORR) నుండి మీర్‌ఖాన్‌పేట్ వరకు – 19.20 కి.మీ.
- రెండో దశలో మీర్‌ఖాన్‌పేట్ నుండి అమంగల్ (RRR) వరకు – 22.30 కి.మీ.లు.
- రైట్ ఆఫ్ వే : 100 మీటర్లు (పాక్షిక యాక్సెస్-కంట్రోల్డ్ ఎక్స్‌ప్రెస్‌వే), 3+3 లేన్ మెయిన్ కెరేజ్ వే (భవిష్యత్తులో 4+4 లేన్లకు విస్తరించదగినది), ప్రత్యేక మెట్రో/రైల్వే కారిడార్, గ్రీన్‌బెల్ట్స్, సైకిల్ ట్రాక్స్, ఫుట్‌పాత్‌లు మరియు సర్వీస్ రోడ్లు.
- గ్రామాలు: రెండు దశల్లో కలిపి 14 గ్రామాలను క‌వ‌ర్ చేస్తూ రోడ్డు నిర్మాణం.
- మొద‌ట దశలో తొమ్మిది గ్రామాలు. ఇందులో కొంగర ఖుర్ద్, ఫీరోజ్‌గూడ, కొంగర కళాన్, లేమూర్, తిమ్మాపూర్, రాచులూరు, గుమ్మడవెల్లి, పంజగూడ, మీర్‌ఖాన్‌పేట్. (మహేశ్వరం, ఇబ్రహీంపట్నం, కండకూరు మండలాలు – రంగారెడ్డి జిల్లా)
- రెండో దశలో ఐదు గ్రామాలు : కుర్మిడ్డ, కడ్తాల్, ముద్విన్, ఆకుతోటపల్లి, అమంగల్. (యాచారం, కడ్తాల్, అమంగల్ మండలాలు – రంగారెడ్డి జిల్లా)
ప్రాజెక్ట్ వ్యయం
మొద‌టి దశలో రూ.1,911 కోట్లు (భూసేకరణ సహా)
రెండో దశలో రూ.2,710 కోట్లు (భూసేకరణ సహా)
మొత్తం ప్రాజెక్ట్ ఖర్చు: రూ.4,621 కోట్లు
ప్రాజెక్ట్ ప్రయోజనాలు
- సులభ అనుసంధానం:* ORR మరియు RRRను నేరుగా కలిపి, దక్షిణ జిల్లాలకు ప్రయాణ సమయం తగ్గుతుంది. ప్రస్తుత మార్గాలపై రద్దీ తగ్గుతుంది. భవిష్యత్తులో పబ్లిక్ ట్రాన్స్‌పోర్ట్ (మెట్రో/రైలు)కు సౌకర్యం ఉంటుంది.
- పరిశ్రమలు, లాజిస్టిక్స్ సౌకర్యం: పరిశ్రమలు, ఐటీ హబ్‌లు, ఫ్యూచర్ సిటీ, స్కిల్ యూనివర్సిటీ, ఈ-సిటీ మరియు ప్రాంతీయ మార్కెట్లకు వేగవంతమైన రవాణా అందుతుంది.
- భారత్ ఫ్యూచర్ సిటీ అనుసంధానం: రహదారి ద్వారా హైదరాబాద్ నుండి రాబోయే ఫ్యూచర్ సిటీకి సులభ రవాణా – ఐటీ పార్కులు, పరిశోధనా కేంద్రాలు, ఆధునిక నివాస సముదాయాలకు అనుసంధానం.
- స్కిల్ యూనివర్సిటీ అనుసంధానం: యూనివర్సిటీ మరియు సమీప పరిశ్రమల మధ్య సులభ రవాణా – ఔషధ, ఎలక్ట్రానిక్స్, ఐటీ, అనుబంధ రంగాల్లో లక్షలాది యువతకు ఉద్యోగ అవకాశాలు.
- ఆర్థికాభివృద్ధి , ఉపాధి: నిర్మాణ దశలో ఉపాధి సృష్టి, ప్రాజెక్ట్ పూర్తయ్యాక ప్రాంతీయ ఆర్థికాభివృద్ధి.
- సుస్థిర రవాణా: సైకిల్ ట్రాక్స్, గ్రీన్‌బెల్ట్స్, ఫుట్‌పాత్‌లు, భవిష్యత్ పబ్లిక్ ట్రాన్స్‌పోర్ట్‌కు సౌకర్యం – పర్యావరణహిత రవాణా.
- ఈ-సిటీ లింక్:* సెమీకండక్టర్, హార్డ్‌వేర్ ఉత్పత్తి పరిశ్రమలకు సులభ రవాణా. ఎగుమతులకు ప్రోత్సాహం. “మేక్ ఇన్ తెలంగాణ” లక్ష్యానికి బలాన్నిస్తుంది.
