హైదరాబాద్‌: ఖైరతాబాద్ గణేశ్ (Khairatabad Ganesh) ఉత్సవం ప్రతి ఏడాది హైదరాబాద్‌లో భక్తి, వైభవాల నిండిన వేడుకగా మారుతుంది. ఈసారి 69 అడుగుల ఎత్తుతో అద్భుతంగా తీర్చిదిద్దిన శ్రీ విశ్వశాంతి మహా గణపతి విగ్రహం భక్తులకు దర్శనమిస్తోంది. వర్షం కురుస్తున్నా భక్తుల ఉత్సాహం ఏమాత్రం తగ్గలేదు. తెలంగాణ గవర్నర్ జిష్ణుదేవ్ వర్మ తొలిపూజ చేయడంతో ఉత్సవాలకు శుభారంభం జరిగింది.
ఖైరతాబాద్ గణేశుడి ఉత్సవాలు ఘనంగా ప్రారంభమయ్యాయి. తెలంగాణ గవర్నర్ జిష్ణుదేవ్ వర్మ (Telangana Governor JishnuDevVarma) తొలిపూజ చేశారు. కార్యక్రమంలో మంత్రి పొన్నం ప్రభాకర్‌, ఎమ్మెల్యే దానం నాగేందర్‌, కాంగ్రెస్‌ నేతలు పాల్గొన్నారు.
వర్షం కురుస్తున్నా ఖైరతాబాద్ (Khairatabad) బడా గణేశ్‌ను దర్శించుకునేందుకు భక్తులు పెద్దఎత్తున తరలివస్తున్నారు. ఈ ఏడాది స్వామివారు శ్రీవిశ్వశాంతి మహా గణపతిగా దర్శనమిస్తున్నారు. 69 అడుగుల ఎత్తు, 28 అడుగుల వెడల్పుతో విగ్రహాన్ని తీర్చిదిద్దారు. గణేశుడికి కుడివైపు శ్రీవాసవీ కన్యకా పరమేశ్వరి అమ్మవారు, ఎడమ వైపున ఖైరతాబాద్ గ్రామదేవత గజ్జలమ్మ ఉన్నారు.
