Film producer Ganesh | నో పాలిటిక్స్.. ఓన్లీ అభిమానం
Film producer Ganesh | నో పాలిటిక్స్.. ఓన్లీ అభిమానం
- సినీ నిర్మాత బండ్ల గణేశ్
- షాద్నగర్ టూ తిరుపతి సంకల్ప యాత్ర
Film producer Ganesh | వెబ్డెస్క్, ఆంధ్రప్రభ : వైసీపీ ప్రభుత్వ హయాంలో అప్పటి ప్రతిపక్ష నేత చంద్రబాబు అరెస్ట్ అయినప్పుడు తీవ్ర మనోవేదనకు గురయ్యానని సినీ నిర్మాత బండ్ల గణేశ్ తెలిపారు. చంద్రబాబు విడుదల కావాలని, ఏ కేసులు ఆయనపై ఉండొద్దని .. అలా జరిగితే షాద్నగర్ నుంచి కాలినడకన తిరుమల వరకు వస్తానని మొక్కుకున్నట్లు ఆయన తెలిపారు. ఈ పాదయాత్రకు ఏ రాజకీయ పార్టీతోనూ సంబంధం లేదని, ఇది పూర్తిగా తన వ్యక్తిగత మొక్కు అని స్పష్టం చేశారు. ఏపీ సీఎం చంద్రబాబుపై ఉన్న అభిమానంతోనే ఈ యాత్ర చేస్తున్నానని, దీనిని రాజకీయ కోణంలో చూడవద్దని ఆయన విజ్ఞప్తి చేశారు.
పాదయాత్ర ప్రారంభానికి ముందు షాద్నగర్లో బండ్ల గణేశ్ మీడియాతో మాట్లాడారు. గత వైసీపీ ప్రభుత్వ హయాంలో అప్పటి ప్రతిపక్ష నేత చంద్రబాబు అరెస్ట్ అయినప్పుడు తాను తీవ్ర ఆవేదనకు గురయ్యానని తెలిపారు. “ఆ రోజు ఉదయం 4.30 గంటలకే చంద్రబాబు అరెస్ట్ వార్త చూసి షాక్కు గురయ్యాను. 40 ఏళ్ల రాజకీయ చరిత్ర ఉన్న నాయకుడిని అలా అరెస్ట్ చేయడం నన్ను తీవ్రంగా కలచివేసింది.
ఆయన జైలు నుంచి క్షేమంగా బయటకు వస్తే, తిరుమలకు పాదయాత్రగా వస్తానని ఏడుకొండల వాడికి మొక్కుకున్నాను” అని బండ్ల గణేశ్ వివరించారు. దేవుడి దయతో 52 రోజుల తర్వాత చంద్రబాబు జైలు నుంచి విడుదలయ్యారని, ఇప్పుడు ఆ మొక్కు తీర్చుకునేందుకే ఈ యాత్ర చేస్తున్నానని తెలిపారు. చంద్రబాబు జైల్లో ఉన్నప్పుడు ఆయనకు ఏమైనా చేస్తారేమోనని ప్రతిక్షణం భయపడ్డానని, కోర్టు వాయిదాల సమయంలో ఢిల్లీకి కూడా వెళ్లానని గుర్తుచేసుకున్నారు.
“ఇది రాజకీయ యాత్ర కాదు. నా అభిమాన నాయకుడి కోసం దేవుడికి మొక్కు చెల్లించుకుంటున్నాను. నేను వేసే ప్రతి అడుగు చంద్రబాబు అభిమాని వేసే అడుగు” అని బండ్ల గణేశ్ పేర్కొన్నారు. తన యాత్రను ఒక సాధారణ భక్తి యాత్రగా మాత్రమే చూడాలని, దీనిపై విమర్శలు చేయవద్దని ఆయన కోరారు. అలాగే, ఈ యాత్రకు రాజకీయాలతో ఎలాంటి సంబంధం లేదని బండ్ల గణేశ్ స్పష్టం చేశారు.
