న‌ల్ల‌గొండ‌కు గోదావరి నీళ్లు…
- ఎస్పారెస్పీ ఫేజ్‌-2 కు ఆర్డీఆర్ పేరు
- దామోద‌ర్‌రెడ్డి సంతాప సభలో సీఎం రేవంత్ రెడ్డి
తుంగతుర్తి, ఆంధ్ర‌ప్ర‌భ : మాజీ మంత్రి రాంరెడ్డి దామోదర్ రెడ్డి పేరును శ్రీరాంసాగర్ ప్రాజెక్ట్ (SRSP) స్టేజ్ – 2కు పెడ‌తామ‌ని ముఖ్య‌మంత్రి రేవంత్ రెడ్డి అన్నారు. తుంగతుర్తిలో దివంగత మాజీ మంత్రి దశదినకర్మ సభ సంద‌ర్భంగా ఏర్పాటు చేసిన సంతాప సభలో ఆయన పాల్గొన్నారు. ఈ సంద‌ర్భంగా ఆయన మాట్లాడుతూ… ఉమ్మడి నల్గొండ జిల్లాకు గోదావరి జలాలను సాధించడంలో కీలక పాత్ర పోషించార‌న్నారు. నల్గొండ జిల్లాలో గోదావరి నీళ్లు ప్రవహిస్తున్నాయంటే అందుకు ఏకైక కారణం రాంరెడ్డి దామోదర్ రెడ్డి చేసిన పోరాటమేనని కొనియాడారు.
ఆయన ఒక నిజమైన కార్యకర్తల నాయకుడని, చివరి క్షణం వరకు తుంగతుర్తి ప్రజల కోసమే పాటుపడ్డారని గుర్తు చేశారు. ఖమ్మం జిల్లా కారేపల్లిలో రైతు కుటుంబంలో జన్మించిన దామోదర్ రెడ్డికి సాగునీటి ప్రాముఖ్యత, వ్యవసాయం విలువ తెలుసని అన్నారు. అందుకే గతంలో ఎడారిగా ఉన్న తుంగతుర్తి ప్రాంతానికి పట్టుబట్టి ఎస్సారెస్పీ స్టేజి 2 ద్వారా గోదావరి జలాలను సాధించిన ప్రజానేత దామోదర్ రెడ్డి అని పేర్కొన్నారు.
ఆయన సేవలు చరిత్రలో చిరస్థాయిగా నిలిచిపోతాయని ప్రశంసించారు. ఉమ్మడి నల్లగొండ, ఖమ్మం జిల్లాలకు రాంరెడ్డి చేసిన అభివృద్ధి, సంక్షేమ సేవలు మరువలేనివని సీఎం అన్నారు. కాంగ్రెస్ పార్టీకి దామోదర్ రెడ్డి కుటుంబం చేసిన సేవలు చిరస్మరణీయమని, వారి కుటుంబానికి పార్టీ ఎల్లవేళలా అండగా ఉంటుందని భరోసా ఇచ్చారు. సభలో మంత్రులు ఉత్తమ్ కుమార్ రెడ్డి, కోమటిరెడ్డి వెంకట్ రెడ్డి సహా పలువురు పార్లమెంటు సభ్యులు, శాసనసభ్యులు, ప్రజాప్రతినిధులు పాల్గొన్నారు.
