ఢిల్లీ చీపురు బీహార్ కి..

ఢిల్లీ చీపురు బీహార్ కి..

బీహార్ లో ఎన్నికల నగారా మోగింది…
అన్ని పార్టీలూ అలర్ట్ అయ్యాయి…
సై అంటే సై అంటూ ప్రచారానికి బరిలో దిగాయి…
ఇప్పటికే రాజుకున్న రాజకీయ వేడి మరింత ప్రచారాల హోరుతో మోతెక్కనుంది.
చాలాకాలంగా అధికారానికి దూరమైన లాలూ ఫ్యామిలీ అర్రులు చాస్తోంది…
అధికారంలో ఉన్న నితీష్ మరో ఐదేళ్ళు ఉండడానికి తన శక్తియుక్తులన్నీ ఉపయోగిస్తున్నారు.
జాతీయ పార్టీ బీజేపీ సహజంగానే బీహార్ ని తన ఖాతాలో వేసుకోవడానికీ, నితీష్ కు ముకుతాడు వేయడానికీ పావులు కదుపుతోంది.
ఇక కాంగ్రెస్ తమవంతు ప్రయత్నం తాము చేస్తోంది..
దేశంలోనే అతి పెద్ద పార్టీ అయిన బీహార్ లో గెలుపు, ఏ పార్టీకైనా కీలకమే. రాబోయే పార్లమెంట్ ఎన్నికలకు ఎంతైనా ప్రభావం చూపుతుందని అంచనా.
ఇంత రంజుగా ఉండబోతున్న రాజకీయ సమరంలో. స్థానికంగా బలంగా వేళ్ళూనుకున్న పార్టీలూ, జాతీయ పార్టీలూ తలపడుతున్న బీహార్ లో…ఆటలో అరటి పండులా మరో పార్టీ నేనున్నానంటూ సమరానికి తానూ సై అంటోంది.
అది కేజ్రీవాల్ నేతృత్వంలోని ఆం ఆద్మీ పార్టీ.
ఈ పార్టీ ఆవిర్భావమే అవినీతిని రూపుమాపే ఎజెండా..
అన్నా హజారే అనుచరుడుగా…అనుంగు శిష్యుడుగా, ఆయనతో బాటు నిరాహార దీక్షల్లో పాల్గొని, ప్రజాభిమానాన్ని పొంది, డిల్లీ పీఠాన్ని అధిష్టించిన నేత కేజ్రీవాల్.

కానీ కాలక్రమాన ఏ ఎజెండాతో అయితే అధికారంలోకొచ్చారో, అదే అవినీతి కూపంలో కూరుకుపోయి, ప్రజల తిరస్కారంతో అధికారానికి దూరమైన పార్టీ..ఆప్.
ప్రజల సొమ్ముతో అద్దాలమేడ నిర్మించుకున్నారని బీజేపీ చేసిన ప్రచారాన్ని తిప్పికొట్టడంలో పూర్తిగా విఫలమయ్యారు కేజ్రీవాల్. అలాగే తన పార్టీలోంచి వరసగా ఒక్కొక్కరే అవినీతి కేసులలో జైలుకు వెళుతుంటే అదంతా బీజేపీ కుట్ర మాత్రమే అని తిప్పికొట్టే ప్రయత్నం చేసినా ఆ వాదనను డిల్లీ ప్రజలు నమ్మలేదు.
స్పష్టమైన మెజారిటీతో బీజేపీకి అధికారాన్ని కట్టబెట్టారు.
అయితే, ఇప్పుడు, సొంత రాష్ట్రమైన డిల్లీలోని ఓటర్లకు తన నిజాయితీని నిరూపించుకోలేకపోయిన కేజ్రీవాల్, అక్కడ ఘోరంగా పరాభవం పొంది, అపజయంపాలై, బీహార్ లో అన్ని స్థానాలకూ పోటీ చేస్తానని ప్రకటించడం కొంత విడ్డూరంగా ఉందని రాజకీయ విశ్లేషకుల అభిప్రాయం. కేజ్రీవాల్ గతమంతా డిల్లీ వాసులకే కాక బీహారీలకు తెలిసినదే కదా..మరి అక్కడి హేమా హేమీలైన రాజకీయ ఉద్దండులనూ, పోటీలో నిలిచిన జాతీయ పార్టీలనూ కాదని, కేజ్రీవాల్ కు అధికారాన్ని కట్టబెడతారా అన్నది సందేహం….