ఉగాది బరిలో అడివి శేష్….
త‌న నటనా ప్రతిభతో ‘ఇండియన్ జేమ్స్ బాండ్’గా మార్క్ తెచ్చుకున్న హీరో అడివి శేష్, ప్రస్తుతం స్పై & యాక్షన్ అడ్వెంచర్ సినిమాలకు కేరాఫ్ అడ్రస్‌గా నిలుస్తున్నారు. 2022లో మేజ‌ర్ (జూన్ 3), హిట్ : ది సెకండ్ కేస్ (డిసెంబ‌ర్ 02) తర్వాత శేష్ నుంచి మరో సినిమా విడుదల కానప్పటికీ, అతని రాబోయే ప్రాజెక్టులపై ప్రేక్షకుల్లో ఎక్స్‌పెక్టేషన్స్ మాత్రం ఏమాత్రం తగ్గలేదు.
ముఖ్యంగా, శేష్ నటిస్తున్న గూఢచారి 2తో పాటు, మృణాల్ ఠాకూర్‌తో కలిసి చేస్తున్న యాక్షన్ డ్రామా ‘డెకాయిట్’ (Dacoit) పై భారీ బజ్ నెలకొంది. తాజాగా, ఈ ఉత్కంఠభరితమైన చిత్రం విడుదల తేదీని చిత్ర యూనిట్ అధికారికంగా ప్రకటించింది.
ఉగాది బరిలో డెకాయిట్…
‘డెకాయిట్’ చిత్రం వచ్చే ఏడాది మార్చి 19న ప్రపంచవ్యాప్తంగా గ్రాండ్‌గా విడుదల కానుంది. తెలుగు ప్రేక్షకులకు శుభవార్త ఏమిటంటే, ఈ చిత్రం తెలుగు సంవత్సరం ప్రారంభమయ్యే పండుగ అయిన ఉగాది సందర్భంగా విడుదల కానుంది. దీంతో ఈ సినిమాకు పండుగ సీజన్ అడ్వాంటేజ్ లభించనుంది.
దాంతో పాటు బాక్సాఫీస్ వద్ద భారీ కాంపిటీషన్ కూడా మొదలు కానుంది. ఎందుకంటే, ఉగాది సందర్భంగా కన్నడ స్టార్ యశ్ నటిస్తున్న అత్యంత ప్రతిష్టాత్మక చిత్రం ‘టాక్సిక్’ (Toxic) కూడా అదే రోజున (మార్చి 19న) విడుదల కానుంది. దీంతో, ఈ రెండు భారీ చిత్రాల మధ్య ఆసక్తికరమైన పోటీ నెలకొననుంది.
అంతేకాకుండా, అదే నెలలో నాని నటిస్తున్న ‘ది ప్యారడైస్’ (మార్చి 26), మెగా పవర్ స్టార్ రామ్ చరణ్ నటించిన ‘పెద్ది’ (మార్చి 27) సినిమాలు కూడా ప్రేక్షకులను పలకరించనున్నాయి. ఇలా వరుసగా భారీ బ‌డ్జెట్ చిత్రాలు థియేటర్లలోకి రానుండటంతో, మార్చి 2026 బాక్సాఫీస్ రేసు మరింత రసవత్తరంగా మారబోతోంది.
‘డెకాయిట్’ డీటెయిల్స్…
‘డెకాయిట్’ చిత్రాన్ని ద్విభాషా చిత్రంగా (తెలుగు, హిందీ) షానియెల్ డియో డైరెక్ట్ చేస్తున్నారు. ఇందులో అడివి శేష్, మృణాల్ ఠాకూర్ లీడ్ రోల్స్ పోషిస్తుండగా, ప్రకాష్ రాజ్, సునీల్, అతుల్ కులకర్ణి వంటి సీనియర్ ఆర్టిస్ట్‌లు కీలక పాత్రల్లో కనిపించనున్నారు.
సుప్రియ యార్లగడ్డ, సునీల్ నారంగ్ సంయుక్తంగా ప్రొడ్యూస్ చేస్తున్న ఈ చిత్రానికి భీమ్స్ సిసిరోలియో మ్యూజిక్ అందిస్తున్నారు. ఇంత బలమైన టెక్నికల్, స్టార్ కాస్ట్‌తో ‘డెకాయిట్’ పాన్ ఇండియా పోరుకు సిద్ధమవుంది. దీంతో ఈ హోరాహోరీ మార్చి నెలలో ఏ సినిమా బ్లాక్‌బస్టర్ విజయం సాధించి, ప్రేక్షకులను ఎంటర్‌టైన్ చేస్తుందో వేచి చూడాలి !
