కోహెడ ఫైరింగ్ రేంజ్ను పరిశీలించిన అదనపు డీజీపీ సంజయ్ కుమార్ జైన్
హైదరాబాద్ శివార్లలోని కోహెడ ప్రాంతంలో, కొత్తగా నిర్మించబడుతున్న 3వ బెటాలియన్ ఫైరింగ్ రేంజ్ పనులను TGSP అదనపు డీజీపీ సంజయ్ కుమార్ జైన్ పరిశీలించారు. ఆయన ఫైరింగ్ రేంజ్ నిర్మాణం, భద్రతా ఏర్పాట్లు, షూటింగ్ లైన్లు, సిబ్బందికి అవసరమైన శిక్షణ సౌకర్యాలను విశ్లేషణాత్మకంగా పరిశీలించారు.
పనుల పురోగతిపై వివరాలు తెలుసుకున్న అనంతరం, రేంజ్ను మరింత ఆధునీకరించేందుకు కీలక సూచనలు చేశారు. ముఖ్యంగా పోలీస్ సిబ్బందికి షూటింగ్ నైపుణ్యం పెంపొందించడానికి ఆధునిక పరికరాలు, సాంకేతికతను ఉపయోగించాలని ఆయన సూచించారు.
అదనంగా, సంజయ్ కుమార్ జైన్ స్వయంగా పోలీస్ సిబ్బందితో పిస్టల్ షూటింగ్ ప్రాక్టీస్ చేశారు, లక్ష్య సాధన పద్ధతులపై సలహాలు అందించారు. ఫైరింగ్ రేంజ్ త్వరలో పూర్తిగా ప్రారంభం అవుతుంది, శిక్షణ కార్యక్రమాలు వేగవంతం అవుతాయని ఆయన తెలిపారు.
సమీక్షలో కమాండెంట్లు జమీల్ పాషా, మురళీ కృష్ణ, రామ కృష్ణ, సత్య శ్రీనివాస రావు, అదనపు కమాండెంట్ శ్రీనివాస రావు మరియు 3వ బెటాలియన్ అధికారులు పాల్గొన్నారు.
