6,432 hectares | ఆశాజనకంగా రబీ పంటల సాగు

6,432 hectares | ఆశాజనకంగా రబీ పంటల సాగు

ఖరీఫ్ కంటే మెరుగైన సాగు విస్తీర్ణం

6,432 hectares | చిత్తూరు, ఆంధ్రప్రభ : జిల్లాలో వరుసగా రెండో ఏడాది కూడా సాధారణ వర్షపాతం నమోదు కాకపోవడంతో చెరువులు, కుంటలు పూర్తిస్థాయిలో నిండలేదు. మరో వైపు మండిపోతున్న ఎండలు తీవ్రంగా పెరగడం వంటి ప్రతికూల పరిస్థితుల మధ్య చిత్తూరు జిల్లా వ్యవసాయం సంక్లిష్ట దశలో నిలిచింది. ఖరీఫ్ సీజన్‌లో కేవలం 7.8 శాతం పంటలకే పరిమితమైన జిల్లాలో, రబీ సీజన్‌లో మాత్రం రైతులు మళ్లీ సాగు బాట పట్టినప్పటికీ, నీటి కొరత, అధిక ఉష్ణోగ్రతలు, తగ్గిన వర్షపాతం ప్రభావం ఇప్పటికీ వ్యవసాయ రంగంపై స్పష్టంగా కనిపిస్తోంది.

వ్యవసాయ శాఖ తాజా గణాంకాల ప్రకారం జిల్లాలో రబీ 2025-26 సీజన్‌లో సాధారణ సాగు విస్తీర్ణం 28,586 హెక్టార్లు కాగా, ఇప్పటివరకు 27,766 హెక్టార్లలో సాగు నమోదై 97.1 శాతం వరకు సాగు పూర్తయింది. ఖరీఫ్‌లో బీడుగా మిగిలిన పొలాలు రబీలో కొంత మేర పచ్చగా మారినా, రైతుల ఆర్థిక పరిస్థితి మాత్రం ఇంకా కోలుకోలేదనే వాస్తవం బయటపడుతోంది.

6,432 hectares | తగ్గిన నూనె గింజలు, పప్పు ధాన్యాల సాగు…

ఈ సంవత్సరం మొత్తం జిల్లాలో వర్షపాతం సాధారణానికి గణనీయంగా తక్కువగా నమోదైంది. దక్షిణ పశ్చిమ, ఈశాన్య రుతుపవనాలు ఆశించిన స్థాయిలో కురవకపోవడంతో చెరువులు, కుంటలు, చిన్న జలాశయాలు పూర్తిస్థాయిలో నిండలేదు. గ్రామీణ ప్రాంతాల్లో వర్షాధార వ్యవసాయం పై ఆధారపడే రైతులు తీవ్ర ఇబ్బందులు ఎదుర్కొన్నారు. హంద్రీ–నీవా జలాలు ప్రధానంగా పుంగనూరు, పలమనేరు, కుప్పం నియోజకవర్గాలకు మాత్రమే పరిమితమవుతూ అక్కడి చెరువులను నింపుతున్నప్పటికీ, జిల్లాలోని ఇతర నియోజకవర్గాలకు ఆ నీటి ప్రయోజనం పూర్తిస్థాయిలో అందడం లేదు.

పూతలపట్టు, చిత్తూరు, గంగాధర నెల్లూరు, నగిరి నియోజకవర్గాల్లో చెరువులు క్రమంగా ఎండిపోతుండడం పరిస్థితి తీవ్రతను తెలియజేస్తోంది. భూగర్భ జలాలు కూడా దిగజారడంతో బోర్లు ఎండిపోవడం రైతులకు మరో పెద్ద సమస్యగా మారింది. ఖరీఫ్ సీజన్‌లో 71,305 హెక్టార్లలో పంటలు సాగు కావాల్సి ఉండగా కేవలం 6,432 హెక్టార్లలో మాత్రమే సాగు జరగడం ద్వారా జిల్లాలో వ్యవసాయం తీవ్రంగా దెబ్బతిన్నది. ముఖ్యంగా వేరుశనగ, రాగులు, కంది, పెసలు, ఉలవలు వంటి వర్షాధార పంటలు దాదాపుగా సాగుకాక రైతులు విత్తనాలే వేయలేని పరిస్థితి ఎదుర్కొన్నారు. వ్యవసాయ శాఖ పంపిణీ చేసిన సుమారు 39 వేల క్వింటాళ్ల సబ్సిడీ వేరుశనగ విత్తనాలు వర్షాలు లేక విత్తలేక వృథాగా మారగా, కొంతమంది రైతులు వాటిని నూనె, చట్నీ కోసం వినియోగించుకోవాల్సిన పరిస్థితి నెలకొంది. పచ్చగా ఉండాల్సిన పంట పొలాలు నెలల తరబడి బీడుగా ఉండటంతో రైతులు అప్పుల బారిన పడ్డారు.

6,432 hectares | చెరువుల్లో ఆవిర‌వుతున్న‌ జలాలు…

ఇలాంటి ప్రతికూల పరిస్థితుల అనంతరం రబీ సీజన్ ప్రారంభం కావడంతో రైతులు నీటి లభ్యత ఉన్న ప్రాంతాల్లో మాత్రమే సాగుకు మొగ్గు చూపారు. జిల్లాలో వరి సాధారణంగా 10,129 హెక్టార్లలో సాగు కావాల్సి ఉండగా, ఈసారి 10,938.6 హెక్టార్లలో సాగై 108 శాతం నమోదు కావడం గమనార్హం. నీటి వనరులు కొంతమేర లభ్యమయ్యే మండలాల్లో రైతులు వరిని ప్రధానంగా ఎంచుకోవడం వల్ల ఈ పెరుగుదల చోటుచేసుకుంది. మక్కజొన్న 389 హెక్టార్ల సాధారణ విస్తీర్ణానికి గాను 440 హెక్టార్లలో సాగై 113.2 శాతం నమోదు కాగా, రాగి 368 హెక్టార్లకు గాను 439.4 హెక్టార్లలో సాగై 119.5 శాతం నమోదైంది. ఎండలను తట్టుకునే పంటల వైపు రైతులు మళ్లినట్లు ఈ గణాంకాలు సూచిస్తున్నాయి.

అయితే పప్పుధాన్యాల సాగు గణనీయంగా తగ్గింది. జిల్లాలో మొత్తం పప్పుధాన్యాల సాధారణ విస్తీర్ణం 8,486 హెక్టార్లు కాగా, కేవలం 5,035 హెక్టార్లలో మాత్రమే సాగు జరగడం ద్వారా 59.3 శాతానికి పరిమితమైంది. ముఖ్యంగా ఉలవలు 7,809 హెక్టార్ల సాధారణ విస్తీర్ణానికి గాను 4,505 హెక్టార్లలో మాత్రమే సాగు కావడం రైతుల నిరాశను పెంచుతోంది. గ్రీన్‌గ్రామ్, కంది, పెసలు వంటి పంటలు చాలా తక్కువ విస్తీర్ణంలోనే సాగయ్యాయి. అలసంద 65 హెక్టార్లకు గాను 57 హెక్టార్లలో సాగి మోస్తరు స్థాయిలో నిలిచింది.

6,432 hectares | అడుగంటుతున్న భూగర్భ జలాలు …

నూనెగింజల పంటల పరిస్థితి మరింత ఆందోళనకరంగా ఉంది. వేరుశనగ సాధారణంగా 2,272 హెక్టార్లలో సాగు కావాల్సి ఉండగా, కేవలం 817.4 హెక్టార్లలో మాత్రమే సాగై 36 శాతానికి పడిపోయింది. వరుసగా రెండో ఏడాది కూడా వేరుశనగ సాగు తగ్గిపోవడంతో రైతుల ఆదాయం తీవ్రంగా పడిపోయే ప్రమాదం నెలకొంది. మొత్తం నూనెగింజల పంటలు 2,642 హెక్టార్ల సాధారణ విస్తీర్ణానికి గాను 1,041 హెక్టార్లలో మాత్రమే సాగై 39.4 శాతానికి పరిమితమయ్యాయి. సూర్యకాంతి, సోయాబీన్, సజ్జ, పత్తి వంటి పంటలు జిల్లాలో దాదాపుగా సాగుకాలేదు.

చెరకు పంట కూడా 6,548 హెక్టార్ల సాధారణ విస్తీర్ణానికి గాను కేవలం 467 హెక్టార్లలో మాత్రమే సాగై 7.1 శాతానికి పడిపోవడం నీటి కొరత తీవ్రతను తెలియజేస్తోంది. ప్రస్తుతం జిల్లాలో మండిపోతున్న ఎండలు రైతులను మరింత ఆందోళనకు గురిచేస్తున్నాయి. ఉష్ణోగ్రతలు క్రమంగా పెరుగుతుండటంతో నేల తేమ వేగంగా తగ్గిపోతోంది. చెరువులు, కుంటలు నిండకపోవడం వల్ల సాగునీటి లభ్యత తగ్గి పంటల పెరుగుదలపై ప్రభావం చూపుతోంది. వరి, రాగి వంటి పంటలు ప్రస్తుతం వృద్ధి నుంచి కోత దశకు చేరుతున్నప్పటికీ, ఎండల తీవ్రత కొనసాగితే దిగుబడులు తగ్గే అవకాశముందని వ్యవసాయ నిపుణులు హెచ్చరిస్తున్నారు. ముఖ్యంగా వేరుశనగ, పప్పుధాన్యాల దిగుబడులు ప్రశ్నార్థకంగా మారే పరిస్థితి నెలకొంది.

పలమనేరు, గంగాధర నెల్లూరు, నగిరి, పూతలపట్టు ప్రాంత రైతులు నీటి కొరత, పెరిగిన సాగు ఖర్చులు, కూలీల కొరతతో ఇబ్బందులు పడుతున్నారు. ఖరీఫ్ పూర్తిగా నష్టపోయాం, రబీలో అయినా పంట నిలిస్తేనే అప్పులు తీర్చగలుగుతాం, కానీ ఎండలు పెరిగితే దిగుబడులు తగ్గిపోతాయి అంటూ రైతులు ఆవేదన వ్యక్తం చేస్తున్నారు. ఎరువులు, విత్తనాలు, డీజిల్ ఖర్చులు పెరగడం, గిట్టుబాటు ధరలపై స్పష్టత లేకపోవడం రైతులను మరింత ఆర్థిక ఒత్తిడిలోకి నెట్టింది.

మొత్తం మీద ఖరీఫ్‌తో పోలిస్తే రబీ సీజన్‌లో సాగు విస్తీర్ణం పెరిగి రైతులు మళ్లీ పొలాల్లోకి దిగినప్పటికీ, తక్కువ వర్షపాతం, చెరువులు నిండకపోవడం, మండిపోతున్న ఎండలు, తగ్గిన పప్పు మరియు నూనెగింజల సాగు వంటి అంశాలు జిల్లాలో వ్యవసాయ భవిష్యత్తుపై అనిశ్చితిని పెంచుతున్నాయి. తక్షణ పరిహారం, పంట బీమా చెల్లింపులు, సాగునీటి వనరుల విస్తరణ, హంద్రీ–నీవా జలాలను మరిన్ని మండలాలకు విస్తరించడం వంటి చర్యలు తీసుకోకపోతే రైతాంగం పూర్తిస్థాయిలో కోలుకోవడం కష్టమేనని వ్యవసాయ నిపుణులు హెచ్చరిస్తున్నారు.