25marchgold | బంగారం-వెండి ధరల భారీ ఎగబాకుడు… మార్కెట్‌లో మళ్లీ హీట్

25marchgold | బులియన్ మార్కెట్‌లో బలమైన కదలికలు
ఎంసిఎక్స్‌లో బంగారం, వెండి ధరల దూకుడు
పశ్చిమాసియా ఉద్రిక్తతల ప్రభావం
పెట్టుబడిదారుల దృష్టి మళ్లీ బంగారంపైనే
రాబోయే రోజుల్లో ఎలా ఉంటాయి ధరలు?

ఆంధ్రప్రభ వెబ్ డెస్క్ : మార్చి 25, 2026 బుధవారం నాడు దేశవ్యాప్తంగా బంగారం, వెండి ధరలు ఒక్కసారిగా గట్టిగా ఎగబాకాయి. గత కొన్ని రోజులుగా స్వల్ప ఒత్తిడిలో ఉన్న బులియన్ మార్కెట్, ఈరోజు ట్రేడింగ్ ప్రారంభం నుంచే బలమైన కదలికలు కనిపించాయి.

మార్కెట్ సమాచారం ప్రకారం, ఎంసిఎక్స్ (MCX)లో బంగారం ధరలు సుమారు 3.5 శాతం వరకు పెరిగి రూ.1.44 లక్షల దగ్గర ట్రేడ్ అవుతుండగా, వెండి ధరలు 5 శాతం కంటే ఎక్కువ పెరిగి రూ.2.35 లక్షల పైగా నమోదయ్యాయి. ఇది ఇటీవల కాలంలో గమనించిన పెద్ద ఎగబాకుడుగా విశ్లేషకులు చెబుతున్నారు.

దేశీయ మార్కెట్‌లో చూస్తే, 24 క్యారెట్ల బంగారం 10 గ్రాముల ధర సుమారు రూ.1,42,900 నుంచి రూ.1,46,670 మధ్యలో ఉంది. 22 క్యారెట్ల బంగారం రూ.1,30,990 నుంచి రూ.1,34,450 వరకు ట్రేడ్ అవుతుండగా, 18 క్యారెట్ల బంగారం ధర రూ.1,07,000 పైగానే కొనసాగుతోంది. వెండి ధర కిలోకు రూ.2,35,000 దాటడం గమనార్హం.

ఈ భారీ పెరుగుదల వెనుక ప్రధాన కారణం పశ్చిమాసియాలో కొనసాగుతున్న ఉద్రిక్తతలు. అంతర్జాతీయ స్థాయిలో యుద్ధ పరిస్థితులపై ఉన్న అనిశ్చితి కారణంగా పెట్టుబడిదారులు మళ్లీ బంగారం వైపు మొగ్గు చూపుతున్నారు. సాధారణంగా ఇలాంటి పరిస్థితుల్లో బంగారాన్ని ‘సేఫ్ హేవెన్’గా భావిస్తారు. అందుకే డిమాండ్ పెరిగి ధరలు ఒక్కసారిగా ఎగిసిపడుతున్నాయి.

అదే సమయంలో, గ్లోబల్ మార్కెట్లలో ఒడిదుడుకులు, డాలర్ మార్పులు కూడా ప్రభావం చూపుతున్నాయి. మార్కెట్ నిపుణుల అభిప్రాయం ప్రకారం, ఇటీవల తగ్గిన ధరల తర్వాత పెట్టుబడిదారులు మళ్లీ కొనుగోళ్లకు దిగడంతో ఈ రీబౌండ్ మరింత వేగంగా కనిపిస్తోంది.

వెండి ధరలు కూడా అదే దిశగా కదిలాయి. పరిశ్రమల వినియోగం, అంతర్జాతీయ డిమాండ్ పెరగడం వల్ల వెండి ధరలు కూడా బలంగా పెరిగినట్లు సమాచారం. గుడ్‌రిటర్న్స్ డేటా ప్రకారం, ఒక్కరోజులోనే వెండి ధరలు కిలోకు రూ.5,000 వరకు పెరగడం గమనార్హం.

మొత్తానికి, బంగారం-వెండి మార్కెట్ మళ్లీ అస్థిర దశలోకి వెళ్లిందనే చెప్పాలి. రాబోయే రోజుల్లో కూడా పశ్చిమాసియా పరిస్థితులు, అంతర్జాతీయ ఆర్థిక పరిణామాలపై ఆధారపడి ధరలు మారే అవకాశముందని విశ్లేషకులు హెచ్చరిస్తున్నారు.

👉 కొనుగోలు చేయాలనుకునే వారు తొందరపడకుండా మార్కెట్ ట్రెండ్‌ను గమనించడం మంచిదని నిపుణులు సూచిస్తున్నారు.