వెల‌గ‌పూడి | ఆసియా అథ్లెటిక్స్ ఛాంపియన్‌షిప్ 2025లో తెలుగు అథ్లెట్ జ్యోతి యార్రాజీ గోల్డ్ మెడల్ సాధించింది. దక్షిణ కొరియాలోని గుమిలో జరుగుతున్న ఆసియా అథ్లెటిక్స్ ఛాంపియన్‌షిప్ 2025లో భారత అథ్లెట్ జ్యోతి యార్రాజీ స్వర్ణ పతకాన్ని గెలుచుకోవడంతో పాటు కొత్త ఛాంపియన్‌షిప్ రికార్డు నెలకొల్పింది. మహిళల 100 మీటర్ల హర్డిల్స్‌లో 12.96 సెకన్ల టైమింగ్‌తో మొదటి స్థానం దక్కించుకుంది.
జ్యోతి 2023లో జరిగిన బ్యాంకాక్ ఎడిషన్‌లో కూడా స్వర్ణం గెలుచుకుంది, అప్పట్లో ఆమె టైమింగ్ 13.09 సెకన్లు. ఈసారి 12.96 సెకన్లతో ఆమె తన స్వంత రికార్డును తానే బద్దలుకొట్టింది. అయితే, జ్యోతి వ్యక్తిగత బెస్ట్ 12.78సెకన్లు. ఈ విజయంతో జ్యోతి ఆసియా ఛాంపియన్‌షిప్‌లో 100 మీటర్ల హర్డిల్స్‌ను రీటైన్ చేసిన ఐదవ అథ్లెట్‌గా నిలిచింది. జపాన్‌కు చెందిన ఎమీ ఆకిమొటో (1979, 1981, 1983), చైనా అథ్లెట్లు జాంగ్ యు (1991, 1993), సు యిన్పింగ్ (2003, 2005), సన్ యావీ (2009, 2011)ల సరసన చేరింది. ఈ రేసులో జపాన్ అథ్లెట్ యుమి తనాకా 13.06 సెకన్లతో సిల్వర్, చైనా అథ్లెట్ వూ యానీ 13.067 సెకన్లతో బ్రాంజ్ గెలుచుకున్నారు. భారత అథ్లెట్ జ్యోతి గోల్డ్ మెడల్ గెలుచుకుంది.
జ్యోతి యర్రాజీకి ఏపీ సీఎం చంద్రబాబు ప్రశంసలు
“భారతదేశపు అత్యంత వేగవంతమైన హర్డిల్స్ రన్నర్, తెలుగమ్మాయి, మన ముద్దుబిడ్డ అయిన జ్యోతి యార్రాజీకి హృదయపూర్వక అభినందనలు. దక్షిణ కొరియాలోని గుమిలో జరుగుతున్న 26వ ఆసియా అథ్లెటిక్స్ ఛాంపియన్‌షిప్‌లో మహిళల 100మీ హర్డిల్స్‌లో స్వర్ణ పతకం సాధించిన మీ విజయంతో దేశం, ఆంధ్రప్రదేశ్‌కు గర్వకారణంగా నిలిచారు. మీ భవిష్యత్తు విజయవంతంగా కొనసాగాలని కోరుకుంటున్నాం” అని ఏపీ ముఖ్యమంత్రి చంద్రబాబు అభినందనలు తెలిపారు.
