Minister | ముంపు గ్రామాల సమస్యలు పరిష్కరిస్తాం
మంత్రి ఉత్తమ్ కుమార్ రెడ్డి
Minister | మక్తల్, ఆంధ్రప్రభ : ముంపు గ్రామాల సమస్యలను పరిష్కరిస్తామని భారీ నీటిపారుదల శాఖ మంత్రి ఉత్తమ్‌కుమార్ రెడ్డి (Uttam Kumar Reddy) అన్నారు. నారాయణపేట జిల్లా మక్తల్ మండలంలోని అనుగొండ గ్రామ శివారులో జూరాల ప్రాజెక్టు సంగంబండ రిజర్వాయర్‌లో ముంపు గ్రామాల భూనిర్వాసితులతో రాష్ట్ర పశుసంవర్ధక క్రీడల శాఖ మంత్రి డాక్టర్ వాకిటి శ్రీహరితో కలిసి ముఖాముఖి కార్యక్రమంలో పాల్గొన్నారు.
ఈ సందర్భంగా ఆయన మాట్లాడుతూ నాకు ఉమ్మడి మహబూబ్ నగర్ (Mahabubnagar) జిల్లాతో ఎంతో అనుబంధం ఉందన్నారు. గతంలో సంగంబండ ప్రాజెక్టలో బండ తొలగింపు కోసం వచ్చానని గుర్తు చేశారు. హెలికాప్టర్‌తో సంగంబండ, భూత్పురు, నేరేడుగం, అనుగొండ, అంకెన్ పల్లి , దాదన్ పల్లి, ముంపు గ్రామాల‌ను ఏరియల్ సర్వే చేయడం జరిగిందన్నారు. త‌న శాఖ పరిధిలో ఉన్న అన్ని సమస్యల పరిష్కారానికి కృషి చేస్తానన్నారు. ముంపు గ్రామాలలో ఉన్న దేవాలయాల పునర్నిర్మాణం చేపడతామన్నారు.
నర్వ మండలం జంగం రెడ్డి పల్లిలో 57 కోట్ల లిఫ్ట్ ఇరిగేషన్ కోసం కృషి చేస్తానన్నారు. మంత్రి వాకిటి శ్రీహరి (Minister Vakiti Srihari) ప్రతినిత్యం ఈ ప్రాంత అభివృద్ధి కోసం ఎంతో పరితపిస్తారని అన్నారు. మంత్రి శ్రీహరి వత్తిడి వల్లే పంచాయతీ ఎన్నికల నోటిఫికేషన్ ఉన్నప్పటికీ ఇక్కడికి రావాల్సి వచ్చిందన్నారు. ఎన్నికల అనంతరం ఈ ప్రాంత సమస్యలను పరిశీలిస్తామని ఉత్తమ్ తెలిపారు. ఈ కార్యక్రమంలో మాజీ ఎంపీపీ గడ్డంపల్లి హన్మంతు, మాజీ జడ్పీటీసీ జి.లక్ష్మారెడ్డి, మార్కెట్ వైస్ చైర్మన్ బి.గణేష్ కుమార్, మాజీ సర్పంచి గడ్డం రమేష్ పాల్గొన్నారు.
