భక్తుల భద్రతే లక్ష్యం
కపిలతీర్థంలో ప్రశాంతంగా తర్పణాలు
అడుగడుగున పోలీసు జల్లెడ
సజావుగా ట్రాఫిక్ స్థితి
ఎస్పీ స్వీయ పర్యవేక్షణ
( తిరుపతి ప్రతినిధి, ఆంధ్రప్రభ) : మహాలయ అమావాస్య సందర్భంగా తిరుపతి కపిలతీర్థం ఆలయంలో తర్పణాలు వదిలే భక్తుల రద్దీని దృష్టి పెట్టుకుని తిరుపతి జిల్లా పోలీస్ శాఖ (Police Department) తగిన బందోబస్తు ఏర్పాట్లు చేసింది. జిల్లా ఎస్పీ ఏల్. సుబ్బరాయుడు (SP L. Subbaraidu) ఆదేశాల మేరకు ఆలయ పరిసర ప్రాంతాల్లో భక్తుల రద్దీని నియంత్రించడానికి అదనపు పోలీస్ సిబ్బంది (Additional Police Personnel)ని నియమించారు. ట్రాఫిక్ రద్దీ లేకుండా వాహనాల కదలికలు సజావుగా సాగేందుకు ప్రత్యేక ట్రాఫిక్ ఏర్పాట్లు చేపట్టారు.
వాహనాల పార్కింగ్ (vehicle parking) స్థలం పరిమితంగా ఉండటంతో, భక్తులకు ఎలాంటి ఇబ్బందులు కలగకుండా ప్రత్యామ్నాయ చర్యలు తీసుకుంటూ ట్రాఫిక్ డైవర్షన్లు (traffic diversions) అమలు చేస్తున్నారు. భక్తులు ఎలాంటి ఇబ్బందులు ఎదుర్కొనకుండా భద్రతా చర్యలు కట్టుదిట్టంగా అమలు అవుతున్నాయి. సీసీ కెమెరా (CCTV cameras)లు ఏర్పాటు చేసి డ్రోన్ కెమెరాలతో కమాండ్ కంట్రోల్ తో నిరంతరం పర్యవేక్షణ జరుగుతోంది. జిల్లా ఎస్పీ ఏల్. సుబ్బరాయుడు స్వయంగా కపిలతీర్థం ఆలయ పరిసర ప్రాంతాలను పర్యవేక్షిస్తూ, అధికారులు, సిబ్బందికి తగిన సూచనలు ఇస్తూ ఏర్పాట్లను పరిశీలించారు.
ఇదే సమయంలో, సోషల్ మీడియాలో “తొక్కిసలాట జరిగింది” అనే తప్పుడు వార్తలు ప్రచారం అవుతున్నాయి. ఈ వార్తలు అసత్యం. కపిలతీర్థం ఆలయ పరిసర ప్రాంతాల్లో ఎటువంటి తొక్కిసలాట జరగలేదు. భక్తుల రద్దీని పూర్తిగా నియంత్రిస్తూ సజావుగా ఏర్పాట్లు జరుగుతున్నాయి. తప్పుడు సమాచారం సృష్టించి సోషల్ మీడియా (social media)లో ప్రచారం చేసే కఠిన చర్యలు తీసుకొంటామని తిరుపతి పోలీసు శాఖ (Tirupati Police Department) హెచ్చరించింది. పోలీస్ శాఖ అధికారిక ప్రకటనలను మాత్రమే నమ్మాలని ప్రజలకు విజ్ఞప్తి చేసింది. భక్తుల భద్రత కోసం నిత్యం కట్టుదిట్టమైన పర్యవేక్షణ కొనసాగిస్తోంది. ప్రజల భద్రత – మా ప్రధాన లక్ష్యం , అని పోలీసు శాఖ స్పష్టం చేసింది.
