కాళేశ్వ‌రం లోపాల‌పై చ‌ర్చిస్తా !

• మామ స్వాతిముత్యం.. అల్లుడు ఆణిముత్యం
• గోదావరి జలాలకు ప్రాణవాయు ఎల్లంపల్లి
• తెలంగాణ ముఖ్యమంత్రి రేవంత్ రెడ్డి

గోదావరిఖని : రూ. లక్షల కోట్లు వెచ్చించి నిర్మించిన కాళేశ్వ‌రం ప్రాజెక్టులో లోపాలు ఉన్నాయని రాష్ట్ర ముఖ్యమంత్రి ఎనుముల రేవంత్ రెడ్డి అన్నారు. గురువారం పెద్దపల్లి జిల్లా లోని ఎల్లంపల్లి ప్రాజెక్టును పరిశీలించారు. అనంతరం మాట్లాడుతూ కాళేశ్వరం ప్రాజెక్టు లో భాగంగా నిర్మించిన మేడిగడ్డ కుంగిపోయిందన్నారు.

గోదావరి జిల్లాలకు ప్రాణవాయువు శ్రీపాద ఎల్లంపల్లి ప్రాజెక్టు అన్నారు. సాంకేతిక నైపుణ్యంతో నిర్మించడం వల్ల ఎల్లంపల్లి ప్రస్తుతం తెలంగాణకు వరప్రదాయిని గా మారిందన్నారు. ఎల్లంపల్లి ప్రాజెక్టుకు వస్తున్నాయి ఇన్ ఫ్లో అవుట్ ఫ్లో పై అధికారులు సీఎంకు వివ‌రించారు. సీఎం వెంట భారీ నీటిపారుదల శాఖ మంత్రి ఉత్తంకుమార్ రెడ్డి, పీసీసీ అధ్యక్షులు మహేష్ కుమార్ గౌడ్, రామగుండం ఎమ్మెల్యే మక్కాన్సింగ్ తో పాటు పలువురున్నారు.

సీఎం మాట‌లు…

• కాళేశ్వరం ప్రాజెక్టు డిజైన్, నిర్మాణం, నిర్వహణలో లోపాలు ఉన్నాయి. రూ. లక్షల కోట్ల ప్రజాధనం వృథా అయింది. నిర్మాణంలో లోపాల వల్లే బ్యారేజీ కుంగిపోయింది.

• మేడిగడ్డ బ్యారేజీలో నీటిని నింపితే కూలిపోయే ప్రమాదం ఉంది. దాంతో ఆస్తి నష్టంతో పాటు ప్రాణ నష్టం జరిగే ప్రమాదం ఉంది. వేలాది ఎకరాలు నీట మునిగే అవకాశాలున్నాయి. నిర్మాణ లోపాలు ఉన్నాయని నివేదికలో తెలిపారు.
• కాళేశ్వరం ప్రాజెక్టు గొప్పగా నిర్మించామని చెప్పు కుంటున్న మామ స్వాతి ముత్యం, అల్లుడు ఆణిముత్యం. వాళ్లలా తాము 80 వేల పుస్తకాలు చదవలేదు. పుస్తకాలు చదివి ప్రాజెక్టు నిర్మించడం వల్ల కూలిపోయింది.
• కాళేశ్వరం ప్రాజెక్టు నిర్మాణంలో జరిగిన లోపాలపై ఎన్డీఎస్ ఇచ్చిన నివేదికపై అసెంబ్లీలో చర్చిస్తాం. సాంకేతిక నైపుణ్యం వైఫల్యంతోపాటు డిజైన్ నిర్మాణం నిర్వహణలో లోపాలు ఉన్నాయని నివేదికలో తెలిపారు. ఆపై చర్యలు తీసుకుంటాం.