విండీస్ కు జైస్వాల్ స్ట్రోక్ !!

ఢిల్లీలో జరుగుతున్న రెండో, ఆఖరి టెస్టు తొలి రోజు ఆట పూర్తిగా టీమిండియా ఆధిపత్యంతో ముగిసింది. అసాధారణ ఫామ్‌లో ఉన్న యువ సంచలనం యశస్వి జైస్వాల్ మరో అద్భుతమైన శతకంతో క్రీజులో పాతుకుపోయాడు. తొలి రోజు ఆట ముగిసే సమయానికి భారత్ 318/2 పటిష్టంగా నిలిచింది.

మంచి ఆరంభం..

వరుసగా ఆరు టాస్‌లు కోల్పోయిన భారత టెస్ట్ కెప్టెన్ శుభ్‌మన్ గిల్‌కు ఎట్టకేలకు అదృష్టం కలిసివచ్చింది. టాస్ గెలిచిన గిల్, పిచ్‌పై కాసేపు నిలదొక్కుకోవడం అవసరమని భావించి, తొలుత బ్యాటింగ్ ఎంచుకున్నాడు. ఓపెనర్లు కేఎల్ రాహుల్, యశస్వి జైస్వాల్ జోడి జాగ్రత్తగా, నిలకడగా ఆరంభించి జట్టుకు చక్కటి పునాది వేసింది.

వీరిద్దరూ కలిసి తొలి వికెట్‌కు 58 పరుగుల భాగస్వామ్యాన్ని నెలకొల్పారు. ఒకవైపు రాహుల్ (38) దూకుడుగా ఆడుతూ కనిపించినా, ఆ క్షణాన జోమెల్ వారికన్ వేసిన అద్భుతమైన బర్నింగ్ డెలివరీకి బోల్తాపడి పెవిలియన్ చేరాడు. దీంతో లంచ్ ముందు భారత్ తొలి వికెట్ కోల్పోయింది.

జైస్వాల్, సుదర్శన్ జోడి పరుగుల సునామీ..

రాహుల్ నిష్క్రమించిన అనంతరం క్రీజులోకి వచ్చిన బి.సాయి సుదర్శన్… జైస్వాల్‌కు గొప్ప సహకారం అందించాడు. లంచ్ విరామం తర్వాత ఈ జోడి గేర్ మార్చి, తమ బ్యాటింగ్ వేగాన్ని పెంచింది. ముఖ్యంగా జైస్వాల్ ఆ తర్వాత మరింత దూకుడుగా ఆడాడు.

సుదర్శన్ కీలక ఇన్నింగ్స్, జైస్వాల్ సెంచరీ!

ఈ యువ జోడి రెండో వికెట్‌కు 193 పరుగుల భారీ భాగస్వామ్యాన్ని నమోదు చేసి, భారత్‌ను పటిష్టమైన స్థితికి చేర్చింది. ఈ క్రమంలో సాయి సుదర్శన్ తనకు దొరికిన లైఫ్‌ను సద్వినియోగం చేసుకుని, తన టెస్టు కెరీర్‌లో అత్యధికమైన 87 పరుగుల కీలక ఇన్నింగ్స్‌ను ఆడాడు.

అయితే, శతకం దిశగా పయనిస్తున్న సమయంలో, వారికన్ వేసిన తిరుగులేని బంతికి ఎల్‌బీడబ్ల్యూగా వెనుదిరగాల్సి వచ్చింది. సుదర్శన్ సెంచరీ చేజార్చుకున్నా, అతని ఇన్నింగ్స్ జట్టుకు ఊపునిచ్చింది. మరోవైపు, యశస్వి జైస్వాల్ మాత్రం తన అద్భుతమైన బ్యాటింగ్‌ను కొనసాగించాడు.

చక్కటి షాట్ సెలక్షన్, అద్భుతమైన టెంపరమెంట్‌తో తన 7వ టెస్ట్ శతకాన్ని పూర్తి చేసుకున్నాడు. తొలి రోజు ఆట ముగిసే సమయానికి భారత్ భారీగా పరుగులు చేసి మ్యాచ్‌పై గట్టి పట్టు సాధించడంలో జైస్వాల్ పాత్ర అత్యంత కీలకం. రెండో రోజు ఆటలో జైస్వాల్ డబుల్ సెంచరీ దిశగా పయనించే అవకాశాలు పుష్కలంగా ఉన్నాయి.

స్కోర్‌కార్డు (Day 1 Stumps)

318/2, ఓవర్లు 90.0

యశస్వి జైస్వాల్ – 253 బంతుల్లో 173*
కేఎల్ రాహుల్ – 54 బంతుల్లో 38
బి. సాయి సుదర్శన్ – 165 బంతుల్లో 87
శుభ్‌మన్ గిల్ (C) – 68 బంతుల్లో 20*

Leave a Reply