హైదరాబాద్ : అనగారిన వర్గాలకు ఉపయోగపడే పథకాలను కాంగ్రెస్ ప్రభుత్వం కొనసాగించాలని.. అప్పుడే అంబేద్కర్ కు నిజమైన నివాళి అని తెలంగాణ మాజీ ముఖ్యమంత్రి కేసీఆర్ అన్నారు. భారత రాజ్యాంగ నిర్మాత, భారత రత్న అవార్డు గ్రహిత డా. భీమ్ రావు అంబేద్కర్ 134 వ జయంతి నేడు. దీంతో దేశవ్యాప్తంగా ఉన్న రాజకీయ ప్రముకులు అంబేద్కర్ జయంతి సందర్భంగా ఆయనకు నివాళులు అర్పిస్తున్నారు. ఇందులో భాగంగా.. కేసీఆర్ అంబేద్కర్ జయంతిని పురస్కరించుకొని నివాళులు అర్పిస్తూ.. ఓ ప్రకటనను విడుదల చేశారు.
ఆ ప్రకటనలో.. అంబేద్కర్ రాసిన రాజ్యాంగం వల్లే తెలంగాణ ఏర్పడిందని గుర్తు చేశారు. రాజ్యాంగంలోని ఆర్టికల్ 3 ద్వారా తెలంగాణ సాధ్యమైందన్నారు. అలాగే తెలంగాణ వచ్చిన తర్వాత అంబేద్కర్ ఆశయాలకు అనుగుణంగా బీఆర్ఎస్ పాలన కొనసాగించిందని గుర్తు చేశారు. గత బీఆర్ఎస్ పాలనలో దళిత బంధు, సహా అనేక పథకాలను అమలు చేశామని ఈ సందర్భంగా కేసీఆర్ గుర్తు చేశారు. కానీ నేటి కాంగ్రెస్ ప్రభుత్వం ఆ పథకాలను కొనసాగించలేక పోతుందని, అనగారిన వర్గాలకు ఉపయోగపడే ఆ పథకాలను కొనసాగించాలని.. అప్పుడే అంబేద్కర్ కు నిజమైన నివాళి అర్పించిన వారమవుతామని కేసీఆర్ తన ప్రకటనలో తెలిపారు.
