లీడ్స్ వేదికగా జ‌రుగుతున్న టెస్టు మ్యాచ్ ఉత్కంఠగా సాగుతోంది. మొదట బ్యాటింగ్ చేసిన భారత జట్టు 471 ప‌రుగుల‌కు ఆలౌట్ అయింది. ఈ భారీ స్కోర్‌కు ప్రతిస్పందనగా, ఇంగ్లాండ్ జట్టు తమ తొలి ఇన్నింగ్స్‌ను దూకుడుగా ప్రారంభించింది.
తొలి ఓవర్‌లో జస్‌ప్రీత్ బుమ్రా — జాక్ క్రాలీ (1)ను ఔట్ చేసి భారత్‌కు మంచి ఆరంభ విజయాన్ని అందించాడు. కానీ ఆ ఆనందం ఎక్కువసేపు నిలవలేదు. ఓపెన‌ర్లు బెన్ డకెట్ (53) – ఒల్లి పోప్ (48) మెల్లిగా ఆడుతూ.. దూకుడు పెంచారు.
బుమ్రా బౌలింగ్ లో జాగ్రత్తగా ఆడిన వీరిద్దరు, మిగిలిన బౌలర్లపై విరుచుకుపడ్డారు. జడేజా కూడా డకెట్ క్యాచ్‌ను వదిలేయడం భారత బౌలింగ్‌కు మరో ఎదురుదెబ్బగా మారింది.
దీంతో టీ బ్రేక్ సమయానికి ఇంగ్లాండ్ 107/1తో నిలవగా, బెన్ డకెట్ (53 నాటౌట్), ఒల్లి పోప్ (48 నాటౌట్) రాణిస్తూ భారత బౌలర్లపై పూర్తి ఆధిపత్యం ప్రదర్శించారు.
భారత్ చేసిన 471 పరుగుల స్కోర్‌ను దృష్టిలో ఉంచుకుంటే, ఇంగ్లాండ్ ఇంకా 364 పరుగుల వెనుకంజలో ఉంది. వికెట్లు మిగిలి ఉండటంతో, ఇంగ్లాండ్ భారీ స్కోర్ బాటలో పయనిస్తోంది.
మరోవైపు, భారత్ మళ్లీ మ్యాచ్‌ను తన కంట్రోల్‌లోకి తీసుకురావాలంటే వీలైనంత త్వరగా వికెట్లు తీసే మార్గం వెతకాల్సిన అవసరం ఉంది. ప్రస్తుతం ఇంగ్లాండ్ బ్యాటింగ్ దూకుడు భారత బౌలింగ్‌ను పరీక్షిస్తుండగా, మిగిలిన రోజు ఆట ఎంతో కీలకం కానుంది.
