అధికారంలోకి వచ్చి ఏడాదిన్నర అవుతున్నా ఇంకెన్నాళ్లు అప్పుల పేరు చెప్పి తప్పించుకు తిరుగుతారని మాజీ మంత్రి హరీష్ రావు సీఎం రేవంత్ రెడ్డిని ప్రశ్నించారు. ఒక అబద్ధాన్ని వందసార్లు చెప్పినంత మాత్రానా అది నిజం కాదని ఆయన అన్నారు.
ఢిల్లీలో జరిగిన ఇండియా టుడే కాన్క్లేవ్‌లో… తెలంగాణ రాష్ట్ర అప్పులపై సీఎం రేవంత్ రెడ్డి మరోసారి తప్పుడు లెక్కలు వేశారని హరీష్ రావు విమర్శించారు.
తెలంగాణ అప్పు రూ.7 లక్షల కోట్లు అని మీరు చేస్తున్న ప్రచారం పూర్తిగా తప్పు అని… రాష్ట్ర అప్పు రూ.4.17 లక్షల కోట్లు మాత్రమే అని అసెంబ్లీలో సభ్యులకు, రాష్ట్ర ప్రజలకు ఆధారాలతో సహా వివరించానట్టు గుర్తు చేశారు.
ముఖ్యమంత్రి హోదాలో ఉండి కూడా పదేప‌దే అదే అబద్ధాన్ని చెబుతూ.. బీఆర్ఎస్ పాలన గురించి తప్పుడు సమాచారాన్ని వ్యాప్తి చేస్తున్నారని హరీష్ రావు సీఎం రేవంత్ రెడ్డిపై మండిపడ్డారు.
ఒకప్పుడు దివ్యంగా ఉన్న రాష్ట్రం, దివాలా తీసిందని…. అబద్దాల‌తో రాష్ట్ర పరపతి, ప్రతిష్ట దిగజార్చుతున్నారని ఆగ్ర‌హం వ్య‌క్తం చేశారు. రాష్ట్ర అప్పులపై రేవంత్ రెడ్డి అబద్ధాలను, అవాస్తవాలను తీవ్రంగా ఖండిస్తున్నామని హరీష్ రావు స్పష్టం చేశారు.
