కృష్ణమ్మ పరవళ్లు..!

• శ్రీశైలం జలాశయం కు మళ్లీ పెరిగిన వరద ఉధృతి…
• ముచ్చటగా మూడోసారి 4 రేడియల్ క్రస్ట్ గేట్లు ఎత్తిన వైనం..
• 2.02 లక్షల క్యూసెక్కులు దిగువకు విడుదల…

నంద్యాల బ్యూరో, ఆగస్టు 12 (ఆంధ్రప్రభ) : ఎగువ ప్రాంతాల్లో కురుస్తున్న వర్షాలు, వరదల కారణంగా కృష్ణమ్మ ఉప్పొంగిపోతోంది. ఎగువన ఉన్న జలాశయాల నుంచి భారీగా నీటిని విడుదల చేయడంతో శ్రీశైలం జలాశయంలోకి వరద ప్రవాహం వేగంగా చేరుతోంది. ఈ నేపథ్యంలో అధికారులు రేడియల్ క్రస్ట్ గేట్లను ఎత్తి, నాగార్జునసాగర్ వైపు నీటిని విడుదల చేశారు.

ఎగువ ప్రాంతాల్లో కురుస్తున్న వర్షాలకు కృష్ణమ్మ (Krishnamma) పరవళ్లు తొక్కుతోంది. ఎగువన ఉన్న జలాశయాల నుంచి భారీగా వరద విడుదల చేస్తున్న నేపథ్యంలో శ్రీశైలం జలాశయంకు భారీగా వరద వచ్చి చేరుతుంది. అధికంగా శ్రీశైలం జలాశయం (Srisailam Reservoir) లోకి 1,89,014 క్యూసెక్కుల నీరు రావడంతో మంగళవారం ఉదయం 8 గంటలకు నాలుగు రేడియల్ ట్రస్ట్ గేట్ల ను పది అడుగుల మేర ఎత్తి నాగార్జునసాగర్ (Nagarjunasagar) కు క్రిందకి నీరు వదిలారు. జూరాల, సుంకేశుల బ్యారేజ్‌ల నుంచి శ్రీశైలం ప్రాజెక్టులోకి 1,89,014 క్యూసెక్కులు చేరుతుండగా.. విద్యుదుత్పత్తి ద్వారా ఏపీ, తెలంగాణ రాష్ట్రాలు 65,689 క్యూసెక్కులను దిగువన సాగర్‌కు విడుదల చేస్తున్నారు.

మహారాష్ట్ర, కర్ణాటక (Maharashtra, Karnataka) ల‌లో విస్తారంగా వర్షాలు కురుస్తున్న నేపథ్యంలో మలప్రభ, ఘటప్రభలలో వరద పోటెత్తుతోంది. దాంతో ఆల్మట్టి, నారాయణపూర్‌ డ్యామ్‌లలోకి వరద ఉధృతి పెరిగింది. శ్రీశైల జలాశయంలో అధికారులు తెలిపిన లెక్కల వివరాల ప్రకారం.. పూర్తిస్థాయి నీటిమట్టం 885 అడుగులు కాగా, ప్రస్తుతం జలాశయంలో 882.60 అడుగులున్నాయి. జలాశయంలో నీటి సామర్థ్యం 215.8070 టీఎంసీలు కాగా, ప్రస్తుతం జలాశయంలో నీటి సామర్థ్యం 202.5056 టీఎంసీలుగా నమోదైంది. విద్యుత్ ఉత్పత్తి (Power generation) కి కుడి ఎడమల నుంచి 65,689 క్యూసెక్కుల నీటిని సాగర్ కు విడుదల చేస్తున్నారు.

ఏపీ జల విద్యుత్ కోసం 30,374 క్యూసెక్కుల నీటిని వాడుతుండగా, తెలంగాణ ప్రాంతం నుంచి 35,315 క్యూసెక్కుల నీటిని జల విద్యుత్ కోసం వినియోగిస్తున్నారు. గత నెల 4వ తేదీన రాష్ట్ర ముఖ్యమంత్రి చంద్రబాబు నాయుడు (CM Chandrababu Naidu) శ్రీశైలం నుంచి 4గేట్లను పైకి ఎత్తి కిందకి నీరు విడుదల చేశారు. తిరిగి రెండవసారి జులై 20వ తారీకున గేట్లు ఎత్తి కిందకి నీరు వదిలారు. ముచ్చటగా మూడోసారి ఆగస్టు (August) నెలలో 12వ తేదీన నాలుగు రేడియల్ క్రస్ట్ గేట్లను పది అడుగుల మేర ఎత్తి సాగర్ కు నీరు వదిలారు.

ప్రస్తుతం శ్రీశైలం జలాశయం కు ఇన్ ఫ్లో 1,89,014 క్యూసెక్కుల నీరు వచ్చి చేరుతుంది. ఇందులో జూరాల ప్రాజెక్టు (Jurala Project) నుంచి 28,870 క్యూసెక్కుల నీరు, స్పిల్ వే నుంచి 1,17,385 క్యూసెక్కుల నీరు, సుంకేసుల ప్రాజెక్టు నుంచి36,909, క్యూసెక్కుల నీరు, హంద్రీ నుంచి 5890 క్యూసెక్కుల నీరు వచ్చి చేరుతుంది. శ్రీశైలం జలాశయం నుంచి క్రిందకు 2,02,456 క్యూసెక్కుల నీరును సాగర్ కు వదులుతున్నారు. ముచ్చటగా ఈ ఏడాది మూడోసారి ట్రస్ట్ గేట్లే ఎత్తటంతో ప్రయాణికుల సందడి మొదలైంది.