కూటమి సర్కారు హయాంలో

కూటమి సర్కారు హయాంలో

• రూ.7.27 కోట్లు సీఎంఆర్ఎఫ్ లో ఇచ్చాం
• మంత్రి డోలా రామాంజనేయులు

టంగుటూరు, ఆంధ్రప్రభ : ప్రజల ఆరోగ్యం, సంక్షేమం కోసం రాష్ట్ర ప్రభుత్వం కృషి చేస్తోందని ఏపీ రాష్ట్ర సాంఘిక సంక్షేమ శాఖ మంత్రి డాక్టర్ డోలా బాల వీరాంజనేయ స్వామి(Dr. Dola Bala Veeranjaneya Swamy) అన్నారు. ఏపీ సీఎం(CM of AP) సహాయ నిధి నుంచి విడుదల చేసిన రూ.32.23 లక్షల ఆర్థిక సాయం చెక్కులను 63 మంది లబ్ధిదారులకు అందజేశారు. తూర్పు నాయుడుపాలెం గ్రామంలోని మంత్రి క్యాంపు కార్యాలయంలో మంగళవారం సీఎంఆర్ఎఫ్ చెక్కుల పంపిణీ కార్యక్రమం జరిగింది.

అనారోగ్యంతో బాధపడుతున్న ప్రజలకు రాష్ట్ర ప్రభుత్వం కొండంత అండగా నిలిచిందని మంత్రి చెప్పారు. రాష్ట్ర ప్రభుత్వం ఆర్థికంగా ఇబ్బందులు పడుతున్నప్పటికీ సంక్షేమ కార్యక్రమాలను ఆపకుండా సమర్థంగా చర్యలు తీసుకుంటుందన్నారు. ప్రజల ఆరోగ్యం కోసం రూ.కోట్లాది నిధులను వెచ్చిస్తుందన్నారు. ఆరోగ్యం కొరకు వైద్యశాల(Hospitals)లో చేరి, అధిక ఖర్చుతో ఇబ్బందులు పడుతున్న వారిని ప్రభుత్వం ఆదుకుంటుందన్నారు.

దుర్గాష్టమి పండుగ రోజున 63 మందికి రూ.32.23 లక్షల రాష్ట్ర ముఖ్యమంత్రి సహాయ నిధి నుంచి నగదును చెక్కు రూపంలో లబ్ధిదారులకు అందజేశారు. కూటమి ప్రభుత్వం ఏర్పడిన తదుపరి కొండపి నియోజకవర్గంలో 880 మందికి రూ. 7.27 కోట్ల నిధులను సీఎంఆర్ఎఫ్(CMRF) కింద అందజేశారు. ప్రజల ఆరోగ్యం, సంక్షేమ కొరకు త్వరలోనే సంజీవిని కార్యక్రమాన్ని ప్రభుత్వం ప్రవేశపెట్టనుందన్నారు. మెరుగైన వైద్య సేవలు అందించడమే లక్ష్యంగా ప్రభుత్వం చర్యలు తీసుకుంటుందన్నారు.

ఎన్టీఆర్ భరోసా పింఛన్ పథకంతో పేదలను ప్రతి నెల ఆదుకుంటుందన్నారు. శ్రీ శక్తి(Shri Shakti) పేరుతో ఉచిత బస్సు ప్రయాణాలను ప్రభుత్వం కల్పిస్తుందన్నారు. ఆటో డ్రైవర్ల సేవలకు రూ.15 వేలు ఆర్థిక సహాయాన్ని మరో రెండు రోజుల్లో అందిస్తుందన్నారు. ఇప్పటికే అన్నదాత సుఖీభవ పేరుతో రైతులకు పెట్టుబడి నిధి అందిస్తుందన్నారు. దీపం-2 పథకం కింద ఉచిత గ్యాస్ సిలిండర్ల(Free Gas Cylinders)ను అర్హులైన వారందరికీ ఇస్తున్నట్లు వివరించారు.

అన్న క్యాంటీన్ల ద్వారా పేదలందరికీ ఐదు రూపాయలకే భోజనం అందిస్తున్నట్లు చెప్పారు. నిరుద్యోగ సమస్య పరిష్కారం కొరకు 16 వేల డీఎస్సీ పోస్టుల(DSC Posts)ను భర్తీ చేయగా, మరో ఆరువేల పోస్టులను పోలీస్ శాఖ(Police Department)లో భర్తీ చేస్తున్నట్లు తెలిపారు. రాష్ట్రాన్ని అన్నివిధాలుగా అభివృద్ధి చేయడానికి రాష్ట్ర ముఖ్యమంత్రి విశేషంగా కృషి చేస్తున్నారని వివరించారు.