క్రమశిక్షణ.. భద్రతే కీలకం !
- ప్రధాని పర్యటన ఏర్పాట్లపై ఏపీ సీఎం దిశనిర్దేశం
ఆంధ్రప్రభ, కర్నూలు బ్యూరో : దేశ ప్రధాన మంత్రి నరేంద్ర మోదీ కర్నూలు, నంద్యాల జిల్లాల్లో పర్యటించనున్న నేపథ్యంలో ఏర్పాట్లపై రాష్ట్ర ముఖ్యమంత్రి నారా చంద్రబాబు నాయుడు సమీక్ష నిర్వహించారు. ఆదివారం విజయవాడలోని క్యాంప్‌ ఆఫీస్‌ నుండి వీడియో కాన్ఫరెన్స్‌ ద్వారా జరిగిన ఈ సమావేశంలో ప్రధాని పర్యటనను విజయవంతం చేయడానికి ప్రతి విభాగం సమన్వయంతో పనిచేయాలని సీఎం సూచించారు.
స్పెషల్‌ ఆఫీసర్‌ వీరపాండియన్‌ సమన్వయం
వీడియో కాన్ఫరెన్స్‌లో ప్రధాని ప్రోగ్రామ్‌ స్పెషల్‌ ఆఫీసర్‌, సీనియర్‌ ఐఏఎస్‌ అధికారి వీరపాండియన్‌, కర్నూలు జిల్లా కలెక్టర్‌ డా. ఏ. సిరి, జిల్లా ఎస్పీ విక్రాంత్‌ పాటిల్‌ పాల్గొన్నారు. పర్యటనలో ప్రధాని భద్రతా వ్యవస్థ, ప్రోటోకాల్‌ అనుసరణ, సభా ప్రాంగణం ఏర్పాట్లు, రోడ్ల మరమ్మత్తు పనులు, పార్కింగ్‌ స్థలాలు, తాగునీటి వసతులు, ప్రజా రాకపోకల నిర్వహణ వంటి అంశాలపై చర్చ జరిగింది.
అధికారులతో సమగ్ర సమీక్ష
ఈ సమావేశంలో పలువురు జిల్లాల ఉన్నతాధికారులు కూడా పాల్గొన్నారు.వీరిలో ఐఏఎస్‌ అధికారులు భరత్‌ గుప్తా, శౌర్యమాన్‌ పటేల్‌, విజయ సునీత, డా. బి. నవ్య, జాయింట్‌ కలెక్టర్లు నూరుల్‌ కమర్‌, అన్నమయ్య జిల్లా జాయింట్‌ కలెక్టర్‌ ఆదర్శ్‌ రాజేంద్రన్‌, అనంతపురం జాయింట్‌ కలెక్టర్‌ శివ్‌ నారాయణ శర్మ, ఆదోని సబ్‌ కలెక్టర్‌ మౌర్య భరద్వాజ్‌, మదనపల్లె సబ్‌ కలెక్టర్‌ చల్లా కళ్యాణి, రాజంపేట సబ్‌ కలెక్టర్‌ భావన, అలాగే ట్రయినీ కలెక్టర్‌ సందీప్‌ రఘువంశి తదితరులు పాల్గొన్నారు.
- ప్రతి అంశంపై సీఎం స్పష్టమైన ఆదేశాలు
ప్రధాని పర్యటనకు సంబంధించి ప్రతి అంశాన్ని ముందుగానే పూర్తి చేయాలని, సమయపాలన, క్రమశిక్షణ, భద్రతపై ఎటువంటి రాజీ ఉండరాదని ముఖ్యమంత్రి స్పష్టం చేశారు.ప్రధాని పర్యటన రాష్ట్రానికి ప్రతిష్టాత్మకమైనది. ప్రజలకు అసౌకర్యం కలగకుండా అన్ని ఏర్పాట్లు పకడ్బందీగా ఉండాలని సీఎం సూచించారు.
అంతేకాకుండా, ప్రధానమంత్రికి సమర్పించబోయే అభివృద్ధి ప్రాజెక్టులపై కూడా అధికారులు వివరణాత్మకంగా నివేదికలు సిద్ధం చేయాలని ఆదేశించారు. ప్రధాని మోదీ పర్యటనను దృష్టిలో ఉంచుకొని ప్రభుత్వం యంత్రాంగం మొత్తం హై అలర్ట్‌లోకి వెళ్లింది. విజయవాడ నుండి సీఎం చంద్రబాబు సమీక్షతో కర్నూలు, అనంతపురం, అన్నమయ్య జిల్లాల అధికారులు చర్యల్లో వేగం పెంచారు.
