ఇంద్రకీలాద్రి కిటకిట !!

• వారాంతపు సెలవులతో తరలివచ్చిన భక్తులు..
• విస్తృత ఏర్పాట్లు చేసిన అధికారులు..

ఆంధ్రప్రభ విజయవాడ : విజయవాడలోని ఇంద్రకీలాద్రిపై ఉన్న శ్రీ దుర్గా మల్లేశ్వర స్వామి వార్ల దేవస్థానానికి ఆదివారం సెలవుదినం కావడం, అయ్యప్ప భక్తులు, భవాని భక్తులతో సహా రెండు తెలుగు రాష్ట్రాలనునుండి వేలాది మంది ఇంద్రకీలాద్రికి తరలి రావడంతో శ్రీ కనకదుర్గ అమ్మవారి సన్నిధి కిటకిట లాడింది. ఉదయం నుండే భక్తుల రద్దీ పెరగడంతో ఆలయ ఈవో శీనా నాయక్ స్వయంగా పర్యవేక్షించి, సిబ్బందికి సూచనలు చేశారు.

అన్ని వాహనాలు ఘాట్ రోడ్ ఓం మలుపు వద్ద క్రమబద్దీకరించారు. ట్రాఫిక్ ఇబ్బంది లేకుండా వన్ టౌన్ పోలీసులు కుమ్మరి పాలెం సెంటర్ నుండి టోల్ గేట్ వరకు వాహనాలు రోడ్ పక్కన పార్కింగ్ చేయించారు. అటు ఘాట్ రోడ్ వైపు, ఇటు మహా మండపం వైపు బ్యాటరీ వాహనాలలో ఉచితంగా వృద్ధులు, వికలాంగులు, చంటి బిడ్డల తల్లులను తరలించే ఏర్పాట్లపై భక్తులు హర్షం వ్యక్తం చేశారు.

భక్తులరద్దీ అనుసరించి 500/- దర్శనం క్యూ లైన్లు క్రమబద్దీకరించారు. అన్ని క్యూ లైన్లు వేగంగా నడిచేలా భక్తులకు వేగంగా దర్శనం కల్పించారు. మహా మండపం దిగువున, లిఫ్ట్ మార్గం వద్ద క్యూలైన్లు పరిశీలన చేసి ప్రత్యామ్యాయమార్గాలు ఏర్పాటు చేశారు. భద్రతాచర్యల్లో భాగంగా కాలేజ్ బ్యాగ్ లు, లగేజీ తో ఆలయ క్యూ లైన్ల లోకి ప్రవేశించిన భక్తులను సిబ్బంది వెనక్కి పంపారు.

లగేజీ క్లోక్ రూమ్ లో భద్ర పరచు కోకుండా ఆలయం లోపలికి ప్రవేశస్తున్న భక్తులను చూసి ఈవో శీనా నాయక్ సిబ్బందిని అలెర్ట్ చేశారు.ఆర్జిత సేవలైన సూర్యోపాసన, చండీ హోమం, లక్ష కుంకుమార్చన తదితర సేవలలో భక్తులు పెద్ద ఎత్తున పాల్గొన్నారు.
ఉచిత ప్రసాదం, అన్న ప్రసాదం భక్తులకు అందేలా ఆలయ అధికారులు చర్యలు తీసుకున్నారు.