AP CM | అనంతపురం జిల్లాలో ముఖ్యమంత్రి పర్యటన..

AP CM | అనంతపురం జిల్లాలో ముఖ్యమంత్రి పర్యటన..

పెండేకల్లు రిజర్వాయర్ పనుల పరిశీలన

AP CM | ఆంధ్రప్రభ వెబ్ డెస్క్ : ఆంధ్రప్రదేశ్ ముఖ్యమంత్రి నారా చంద్రబాబు నాయుడు సోమవారం అనంతపురం జిల్లాలోని తాడిపత్రి నియోజకవర్గంలో పర్యటించారు. జిల్లాలోని యాడికి మండలానికి చేరుకున్న ఆయనకు ప్రజాప్రతినిధులు, ప్రభుత్వ అధికారులు ఘనస్వాగతం పలికారు. వేములపాడు గ్రామంలో ఏర్పాటు చేసిన విమానశ్రయానికి చేరుకున్న ముఖ్యమంత్రి, అక్కడి నుండి నేరుగా అభివృద్ధి పనుల పరిశీలనకు వెళ్లారు.

నీటి భద్రతపై సమీక్ష:

ముఖ్యమంత్రి తన పర్యటనలో భాగంగా తొలుత పెండేకల్లు నీటి నిల్వ కేంద్రం (రిజర్వాయర్) పనులను క్షుణ్ణంగా పరిశీలించారు. అనంతరం “జలధార” పథకంలో భాగంగా చేపట్టిన పనులకు సంబంధించిన ఛాయాచిత్ర ప్రదర్శనను సందర్శించారు. హంద్రీనీవా కాలువ ద్వారా సాగునీటి ప్రయోజనాలు పొందుతున్న రైతులతో మరియు సాగునీటి సంఘాల ప్రతినిధులతో ఆయన ప్రత్యేకంగా సమావేశమయ్యారు. ఈ సందర్భంగా నీటి భద్రత మరియు సాగునీటి వినియోగంపై రైతులకు పలు సూచనలు చేశారు.

కార్యకర్తలతో భేటీ:

జలధార కార్యక్రమం అనంతరం వేములపాడు గ్రామంలో పార్టీ కార్యకర్తలతో ముఖ్యమంత్రి సమావేశమయ్యారు. స్థానిక సమస్యలతో పాటు పార్టీ బలోపేతంపై వారితో చర్చించారు. ఈ పర్యటన ముగించుకుని సాయంత్రం ఆయన తిరిగి ప్రయాణమయ్యారు. జిల్లాలో సాగునీటి ప్రాజెక్టులను త్వరితగతిన పూర్తి చేయడమే ప్రభుత్వ లక్ష్యమని ఈ సందర్భంగా ఆయన స్పష్టం చేశారు.