Vehicles | భవానీల కోసం బ్యాటరీ వాహనాలు
Vehicles | భవానీల కోసం బ్యాటరీ వాహనాలు
Vehicles | విజయవాడ, ఆంధ్రప్రభ : విజయవాడలోని ఇంద్రకీలాద్రిపై కొలువైన శ్రీ దుర్గా మల్లేశ్వర స్వామి వారి దేవస్థానంలో జరుగుతున్న వార్షిక భవానీ దీక్ష విరమణ మహోత్సవాలకు విచ్చేస్తున్న లక్షలాది మంది భక్తులకు మెరుగైన సౌకర్యాలు కల్పించే దిశగా దేవస్థానం అధికారులు వినూత్నమైన, సానుకూల ఫలితాలనిచ్చే నూతన పథకాలను ప్రవేశపెట్టారు. భక్తుల సౌకర్యార్థం, ముఖ్యంగా వృద్ధులు, శారీరక సవాలు కలిగిన వ్యక్తులు (దివ్యాంగులు), చిన్నపిల్లలతో ఉన్న కుటుంబాల కోసం ప్రత్యేకంగా నాలుగు బ్యాటరీ వాహనాలను ప్రవేశపెట్టారు. దాతల సహకారంతో వివిధ బ్యాంకుల నుంచి (సిటీ యూనియన్ బ్యాంక్, కెనరా బ్యాంక్, కరూర్ వైశ్యా బ్యాంక్ తదితర) విరాళాలు సేకరించి ఈ వాహనాలను సమకూర్చారు. ఈ సేవలు భక్తుల నుంచి సానుకూల స్పందనను పొందుతున్నాయి.
ఈ వాహనాలు ఘాట్ రోడ్ పైకి, దుర్గానగర్ డౌన్ హిల్ ప్రాంతాలలో అందుబాటులో ఉంచబడ్డాయి (ఘాట్ రోడ్లో రెండు, దుర్గానగర్లో రెండు). చాలా దూరం నడిచి వచ్చిన భవానీలు, వృద్ధులు, మరియు దివ్యాంగుల కుటుంబాలు ఒకేసారి కొండపైకి చేరుకోవడానికి ఈ వాహనాలు ఎంతో ఉపయోగకరంగా ఉన్నాయి. దీంతో భక్తులు హర్షం వ్యక్తం చేస్తున్నారు. ఇటీవల అక్రమణకు గురైన దేవస్థానం భూమిని తిరిగి స్వాధీనం చేసుకొని, దానిని భక్తుల సేవా కేంద్రంగా మార్చారు. ఈ కొత్త కేంద్రం భవాని దీక్ష విరమణ సమయంలో భక్తులకు విశేష సేవలను అందిస్తోంది. ఈ నూతన సంస్కరణల పట్ల భక్తులు, ముఖ్యంగా వృద్ధులు మరియు శారీరక సవాలు కలిగిన భవానీ భక్తులు కార్యనిర్వహణాధికారి వి.కె. సీనా నాయక్, దేవస్థానం యాజమాన్యానికి తమ కృతజ్ఞతలు తెలియజేస్తున్నారు. ఈ ఏర్పాట్లు భక్తులకు ఎంతో ఉపశమనాన్ని, సంతృప్తిని కలిగిస్తున్నాయి.
