ప్రధానమంత్రి నరేంద్ర మోడీకి ఉక్రెయిన్ అధ్యక్షుడు జెలెన్స్కీ కి ఫోన్ చేశారు. ప్రస్తుత యుద్ధ పరిస్థితి, శాంతి–స్థిరత్వం కోసం చేపట్టాల్సిన చర్యలపై ఇద్దరు నేతలు విస్తృతంగా చర్చించారు.
ప్రధానమంత్రి మోదీ తక్షణ కాల్పుల విరమణతోపాటు, సంభాషణా–దౌత్య మార్గాల ద్వారానే శాశ్వత పరిష్కారం సాధ్యమని మరోసారి పునరుద్ఘాటించారు. ఇటీవల జరిగిన దాడుల్లో ప్రాణాలు కోల్పోయిన వారి కుటుంబాలకు సానుభూతి వ్యక్తం చేశారు.
అమెరికా అధ్యక్షుడు డొనాల్డ్ ట్రంప్, యూరోపియన్ నాయకులతో వాషింగ్టన్‌లో తాను జరిపిన చర్చల గురించి అధ్యక్షుడు జెలెన్స్కీ ప్రధానమంత్రికి వివరించారు. రష్యాతో నేరుగా చర్చలకు ఉక్రెయిన్ సిద్ధంగా ఉన్నప్పటికీ, ఇప్పటివరకు ఎలాంటి సానుకూల సంకేతాలు ఇవ్వలేదని, బదులుగా పౌర ప్రాంతాలపై దాడులు కొనసాగించి నిరపరాధుల ప్రాణాలు తీస్తోందని ఆవేదన వ్యక్తం చేశారు.
రాబోయే షాంఘై సహకార సంస్థ (SCO) సదస్సు దృష్ట్యా, మోదీ-జెలన్స్కీ తమ అభిప్రాయాలను సమన్వయం చేసుకున్నారు. ఈ సందర్భంలో ప్రధానమంత్రి మోదీ, రష్యాతోపాటు ఇతర దేశాధినేతలకు కూడా శాంతి సందేశం చేరవేసేలా భారత్ తగిన కృషి చేస్తుందని హామీ ఇచ్చారు.
అలాగే, ద్వైపాక్షిక సంబంధాల బలోపేతంపై కూడా మోదీ-జెలన్స్కీ చర్చించి.. పరస్పర పర్యటనలు, సంయుక్త అంతర ప్రభుత్వ కమిషన్ సమావేశం వంటి అంశాలపై సమీక్ష జరిపారు. భారత్–ఉక్రెయిన్ భాగస్వామ్యంలో ఉన్న అవకాశాలను పూర్తిగా వినియోగించుకోవాలని అంగీకరించారు. త్వరలోనే ప్రధానమంత్రి మోదీని కలుసుకోవాలని అధ్యక్షుడు జెలెన్స్కీ ఆశాభావం వ్యక్తం చేశారు.
