ప్రపంచ ప్రసిద్ధ వింబుల్డన్ టెన్నిస్ టోర్నమెంట్‌ ఉత్కంఠభరిత ముగింపు దశకు చేరుకుంది. ఈ రోజు పురుషుల సింగిల్స్ ఫైనల్‌ జరుగుతోంది. ప్రస్తుతానికి ప్రపంచంలోనే అత్యుత్తమ ఆటగాళ్లుగా గుర్తింపు పొందిన టాప్ రెండు సీడెడ్ ప్లేయ‌ర్లు కార్లోస్ ఆల్కారాజ్, జానిక్ సిన్నర్ ఈ గ్రాండ్‌స్లామ్‌ కిరీటం కోసం అమీతుమీ త‌ల‌ప‌డ‌నున్నారు.
ఇప్పటికే రెండు సార్లు వరుసగా వింబుల్డన్ టైటిల్‌ను గెలుచుకున్న ఆల్కారాజ్ ఈసారి అరుదైన త్రీ-పీట్‌ సాధించడానికి సిద్ధమయ్యాడు. అయితే ఆ లక్ష్యాన్ని సాధించడానికి అతనికి అతిపెద్ద అడ్డంకి అతని పెద్ద ప్రత్యర్థి ఇటలీ స్టార్ జానిక్ సిన్నర్.
గత నెల ఫ్రెంచ్ ఓపెన్‌ ఫైనల్‌లో వీరిద్దరి మధ్య జరిగిన రోమాంచక పోరులో ఆల్కారాజ్ విజయం సాధించాడు. ఆ మ్యాచ్‌లో సిన్నర్‌కి మ్యాచ్ పాయింట్లు ఉన్నా చివరికి గెలుపు దూరమయ్యింది. ఈసారి ఆ పరాజయానికి ప్రతీకారం తీర్చేందుకు సిన్నర్ కోర్టులోకి దిగుతున్నాడు.
కాగా, సెమీఫైనల్‌లో సిన్నర్ దిగ్విజయంగా నోవాక్ జకోవిచ్‌ను సూటి సెట్లలో ఓడించి ఫైనల్‌కి చేరాడు. మరోవైపు ఆల్కారాజ్ నాలుగో సీడ్‌ టైలర్ ఫ్రిట్జ్‌పై నాలుగు సెట్ల పోరాటంలో గెలిచి ఈ అద్భుత సమరం సిద్ధం చేశాడు.
ఆధునిక టెన్నిస్‌కు ఐకాన్‌లుగా మారిన ఈ ఇద్దరూ నేడు వింబుల్డన్ మైదానంలో తమ ప్రతిష్టను, బలాన్ని నిలుపుకుంటూ టైటిల్ కోసం బ‌రిలోకి దిగ‌నున్నారు.
