AP | పుట్టపర్తి నుంచే ప్రపంచ రికార్డు ముద్ర!
AP | పుట్టపర్తి నుంచే ప్రపంచ రికార్డు ముద్ర!
రాజ్‌పథ్ ఇన్‌ఫ్రాకాన్‌కు నాలుగు గిన్నిస్ వరల్డ్ రికార్డులు
ఎమ్మెల్యే పల్లె సింధూర రెడ్డికి గిన్నిస్ రికార్డు జ్ఞాపిక అందజేత
AP | శ్రీ సత్య సాయి బ్యూరో , అక్టోబర్ 2 (ఆంధ్రప్రభ): పుట్టపర్తి ప్రాంతంలో నిర్మాణంలో ఉన్న బెంగళూరు–విజయవాడ ఎకనామిక్ కారిడార్ పనుల్లో కీలక పాత్ర పోషిస్తున్న రాజ్‌పథ్ ఇన్‌ఫ్రాకాన్ సంస్థ ప్రతిష్టాత్మక గిన్నిస్ వరల్డ్ రికార్డులను సాధించడం పట్ల అభినందనలు వెల్లువెత్తుతున్నాయి. రోడ్డు నిర్మాణ రంగంలో సంస్థ సాధించిన నాలుగు గిన్నిస్ వరల్డ్ రికార్డుల జ్ఞాపికను పుట్టపర్తి నియోజకవర్గ ఎమ్మెల్యే పల్లె సింధూర రెడ్డికి రాజ్‌పథ్ ఇన్‌ఫ్రాకాన్ అధినేత జగదీశ్ కదమ్ అందజేశారు.
ఈ సందర్భంగా జగదీశ్ కదమ్ ఎమ్మెల్యే పల్లె సింధూర రెడ్డి, మాజీ మంత్రి పల్లె రఘునాథ్ రెడ్డిలను మర్యాదపూర్వకంగా కలిశారు. సంస్థ చేపడుతున్న రహదారి నిర్మాణ పనులు, సాధించిన గిన్నిస్ వరల్డ్ రికార్డులకు సంబంధించిన వివరాలను వారికి వివరించారు. పుట్టపర్తి సమీపంలో నిర్మాణంలో ఉన్న బెంగళూరు–విజయవాడ ఎకనామిక్ కారిడార్ పనుల్లో సంస్థ సాధించిన ఈ అంతర్జాతీయ గుర్తింపు నిర్మాణ రంగంలో ప్రత్యేక ప్రాధాన్యం సంతరించుకుందని తెలిపారు.
ప్రపంచస్థాయి గుర్తింపు…
దేశంలో మౌలిక వసతుల అభివృద్ధికి అత్యంత ప్రాధాన్యం లభిస్తున్న నేపథ్యంలో భారీ రహదారుల నిర్మాణంలో ఆధునిక సాంకేతికత, అత్యాధునిక యంత్ర సామగ్రి, నైపుణ్యం కలిగిన మానవ వనరుల వినియోగం కీలకంగా మారింది. ఈ నేపథ్యంలో రాజ్‌పథ్ ఇన్‌ఫ్రాకాన్ సాధించిన నాలుగు గిన్నిస్ వరల్డ్ రికార్డులు సంస్థ సామర్థ్యాన్ని ప్రపంచ స్థాయిలో చాటిచెప్పే గుర్తింపుగా నిలిచాయి.
పుట్టపర్తి పరిసర ప్రాంతాల మీదుగా సాగుతున్న బెంగళూరు–విజయవాడ ఎకనామిక్ కారిడార్ భవిష్యత్తులో ఈ ప్రాంత రవాణా వ్యవస్థకు కీలకంగా మారనుంది. పారిశ్రామిక, వాణిజ్య కార్యకలాపాలకు ఊతమివ్వడంతో పాటు రాయలసీమ ప్రాంతాన్ని ప్రధాన రవాణా మార్గాలతో అనుసంధానించడంలో ఈ కారిడార్ ప్రాధాన్యం కలిగి ఉంది. ఇలాంటి ప్రతిష్టాత్మక ప్రాజెక్టులో పనిచేస్తున్న సంస్థకు అంతర్జాతీయ స్థాయి గుర్తింపు లభించడం పట్ల స్థానికంగా కూడా ఆసక్తి వ్యక్తమవుతోంది.
ఎమ్మెల్యే అభినందనలు…
గిన్నిస్ వరల్డ్ రికార్డు జ్ఞాపికను అందుకున్న ఎమ్మెల్యే పల్లె సింధూర రెడ్డి సంస్థ ప్రతినిధులను అభినందించారు. భారతదేశ నిర్మాణ రంగ ప్రతిభను ప్రపంచ స్థాయిలో చాటిచెప్పేలా ఇలాంటి ప్రతిష్టాత్మక రికార్డులు సాధించడం అభినందనీయమని పేర్కొన్నారు. మౌలిక వసతుల అభివృద్ధిలో నాణ్యత, వేగం, సాంకేతికతకు ప్రాధాన్యం పెరుగుతున్న తరుణంలో రాజ్‌పథ్ ఇన్‌ఫ్రాకాన్ సాధించిన గుర్తింపు ఇతర నిర్మాణ సంస్థలకు స్ఫూర్తిదాయకంగా నిలుస్తుందని అన్నారు.
బెంగళూరు–విజయవాడ ఎకనామిక్ కారిడార్ పనులు పూర్తయితే పుట్టపర్తి ప్రాంతంతో పాటు పరిసర ప్రాంతాల్లో రవాణా సౌకర్యాలు మరింత మెరుగుపడే అవకాశం ఉందన్నారు. ఈ తరహా జాతీయ ప్రాధాన్యమున్న మౌలిక వసతుల ప్రాజెక్టులు ప్రాంతీయ అభివృద్ధికి దోహదపడతాయని పేర్కొన్నారు.
రాజ్‌పథ్ ఇన్‌ఫ్రాకాన్ సంస్థ భవిష్యత్తులో మరిన్ని ప్రతిష్టాత్మక విజయాలు సాధించాలని, దేశ నిర్మాణ రంగంలో మరింత కీలకమైన ప్రాజెక్టులను చేపట్టి తన సేవలను విస్తరించాలని ఎమ్మెల్యే ఆకాంక్షించారు. సంస్థ సాధించిన గిన్నిస్ రికార్డులు నిర్మాణ రంగంలో భారత సామర్థ్యానికి అంతర్జాతీయ గుర్తింపు తీసుకురావడం గర్వకారణమని పేర్కొన్నారు. ఈ కార్యక్రమంలో రాజ్‌పథ్ ఇన్‌ఫ్రాకాన్ సంస్థ ప్రతినిధులు, సిబ్బంది, ఇతరులు పాల్గొన్నారు.
