టీమిండియా పిలుపు కోసం ఎదురుచూపులు.. కృణాల్ ఆసక్తికర పోస్ట్
ఆంధ్రప్రభ : టీమిండియాలోకి తిరిగి వస్తాడని భావించిన కృణాల్ పాండ్యాకు అఫ్గానిస్థాన్తో టీ20 సిరీస్ జట్టులో చోటు దక్కలేదు. ఐపీఎల్లో వరుసగా రెండు సీజన్లలో నిలకడగా రాణించడంతో అతడి పేరు సెలెక్టర్ల పరిశీలనలో ఉందన్న వార్తలు వచ్చాయి. అయితే సెప్టెంబర్ 1న ప్రకటించిన 15 మంది సభ్యుల జట్టులో కృణాల్ పేరు కనిపించలేదు. ఈ నేపథ్యంలో తన ఎంపికపై కృణాల్ తొలిసారి స్పందించాడు. భారత జెండాతో ‘హోప్ ఈజ్ స్టిల్ అలైవ్’ అంటూ ఇన్స్టాగ్రామ్ స్టోరీలో పంచుకున్నాడు.
కృణాల్ పెట్టిన ఈ పోస్ట్ ఇప్పుడు క్రికెట్ వర్గాల్లో ఆసక్తికరంగా మారింది. అఫ్గాన్ సిరీస్కు ఎంపిక కాకపోయినా.. టీమిండియాలోకి తిరిగి రావాలన్న తన ఆశలను కృణాల్ వదులుకోలేదనే సంకేతాన్ని ఈ సందేశం ఇస్తోంది. త్వరలోనే మరో అవకాశం వస్తుందన్న నమ్మకంతో ఉన్నట్లు ఆ పోస్టును బట్టి తెలుస్తోంది.
కృణాల్ చివరిసారిగా 2021లో శ్రీలంక పర్యటనలో భారత్ తరఫున ఆడాడు. ఆ తర్వాత అంతర్జాతీయ జట్టుకు దూరమయ్యాడు. ఇప్పటివరకు భారత్ తరఫున ఐదు వన్డేలు, 19 టీ20లు ఆడిన అతడు.. వన్డేల్లో రెండు, టీ20ల్లో 15 వికెట్లు సాధించాడు. టీ20ల్లో ఒకసారి నాలుగు వికెట్ల ప్రదర్శన కూడా చేశాడు. దాదాపు ఐదేళ్ల తర్వాత అతడి కమ్బ్యాక్పై చర్చ జరగడంతో ఈసారి జట్టులో చోటు దక్కుతుందని అభిమానులు కూడా ఆశించారు.
ఐపీఎల్ ప్రదర్శనతో మళ్లీ చర్చలోకి..
రాయల్ ఛాలెంజర్స్ బెంగళూరు తరఫున గత రెండు ఐపీఎల్ సీజన్లలో కృణాల్ పాండ్యా నిలకడగా రాణించాడు. ఆర్సీబీ వరుసగా రెండు టైటిళ్లు సాధించిన ప్రయాణంలో అతడి బౌలింగ్ కీలకంగా మారింది. 2025, 2026 సీజన్లలో కలిపి 31 వికెట్లు సాధించి టీ20లో తన విలువను మరోసారి చాటుకున్నాడు. ముఖ్యంగా కీలక సమయాల్లో బంతిని చేతిలోకి తీసుకుని ప్రత్యర్థి బ్యాటర్లపై ఒత్తిడి పెంచడం అతడి ప్రత్యేకతగా నిలిచింది.
బౌలింగ్తో పాటు అవసరమైన సమయంలో బ్యాట్తోనూ సహకారం అందించగలగడం కృణాల్కు అదనపు బలం. స్పిన్లో వైవిధ్యమైన బంతులు సంధిస్తూ పరుగులను నియంత్రించడం, పరిస్థితులకు తగ్గట్టుగా వ్యూహాన్ని మార్చుకోవడం అతడికి మంచి గుర్తింపు తెచ్చాయి. ఈ ప్రదర్శనతోనే మరోసారి టీమిండియా ఎంపికపై చర్చ మొదలైంది. అఫ్గాన్ సిరీస్కు అతడి పేరును పరిశీలిస్తున్నారన్న వార్తలు రావడంతో కమ్బ్యాక్ దాదాపు ఖాయమనే అంచనాలు కూడా వెలువడ్డాయి. అయితే తుది జట్టులో మాత్రం అతడికి అవకాశం లభించలేదు.
ఆశ మాత్రం వదల్లేదు..
అఫ్గానిస్థాన్తో సిరీస్కు అవకాశం రాకపోయినా.. కృణాల్ సందేశం మాత్రం మరో అవకాశంపై అతడి నమ్మకాన్ని స్పష్టం చేసింది. భారత టీ20 షెడ్యూల్లో ఇంకా పలు సిరీస్లు ఉండటంతో.. నిలకడగా రాణిస్తే సెలెక్టర్ల దృష్టిని మరోసారి ఆకర్షించే అవకాశం ఉంది. ముఖ్యంగా ఆర్సీబీ తరఫున అతడు కొనసాగిస్తున్న ప్రదర్శన భవిష్యత్తులో అతడి ఎంపికకు కీలకంగా మారొచ్చు.
ప్రస్తుతం టీమిండియాలోకి కృణాల్ పాండ్యా తిరిగి వస్తాడా లేదా అన్నది సెలెక్టర్ల నిర్ణయంపైనే ఆధారపడి ఉంది. అయితే ‘హోప్ ఈజ్ స్టిల్ అలైవ్’ అంటూ కృణాల్ పెట్టిన పోస్ట్ మాత్రం.. తన అంతర్జాతీయ కెరీర్కు ఇంకా ముగింపు పలకలేదనే విషయాన్ని చెప్పకనే చెప్పింది.
