Venky | “ఆదర్శ కుటుంబం హౌస్ నెం: 47”
- “ఆదర్శ కుటుంబం హౌస్ నెం: 47” షూటింగ్ ప్రారంభం..
- ఆకట్టుకుంటున్న ఫస్ట్ లుక్..
Venky | ఆంధ్రప్రభ వెబ్ డెస్క్ : విక్టరీ వెంకటేష్, మాటల మాంత్రికుడు త్రివిక్రమ్ శ్రీనివాస్ (Trivikram Srinivas) కలయికలో రానున్న చిత్రం కోసం సినీ ప్రియులంతా ఎంతగానో ఎదురుచూస్తున్నారు. కుటుంబ కథా చిత్రాల కథానాయకుడిగా వెంకటేష్ కి ప్రత్యేక గుర్తింపు ఉంది. అలాగే, చక్కిలిగింతలు పెట్టే హాస్యం, హృదయాన్ని హత్తుకునే భావోద్వేగాల మేళవింపుతో కుటుంబ బంధాలను, విలువలను తెలియజేసే చిత్రాలను తెరకెక్కించడంలో త్రివిక్రమ్ దిట్ట. అందుకే వీరి కలయికలో రానున్న మూవీ అందరి దృష్టిని ఆకర్షించింది. వెంకటేష్ సినీ ప్రయాణంలో 77వ చిత్రంగా రూపొందుతోన్న ఈ సినిమాకి “ఆదర్శ కుటుంబం హౌస్ నెం: 47” అనే ఆసక్తికర టైటిల్ ను ఖరారు చేశారు. టైటిల్ లోగోని గమనిస్తే.. వినోదభరితమైన ఈ కుటుంబ కథా చిత్రంలో ఉత్కంఠ రేకెత్తించే అంశాలు కూడా ఉంటాయని అర్థమవుతోంది.
ఆదర్శ కుటుంబం హౌస్ నెం: 47 ఫస్ట్ లుక్ ఆకట్టుకుంటోంది. వెంకటేష్ (Venkatesh) ఫ్యామిలీ మ్యాన్ లుక్లో క్లాస్ గా కనిపిస్తున్నారు. హృదయాన్ని తాకే భావోద్వేగాలతో నిండిన ఆసక్తికర కథాంశంతో ఈ చిత్రం రాబోతోందని ఫస్ట్ లుక్ బట్టి తెలుస్తోంది. ఈ రోజు హైదరాబాద్లోని అల్యూమినియం ఫ్యాక్టరీలో షూటింగ్ స్టార్ట్ అయ్యింది. వెంకటేష్ – త్రివిక్రమ్ కలయిక మరోసారి ప్రేక్షకులందరికీ చిరస్మరణీయమైన అనుభూతిని అందించడానికి సిద్ధమవుతోంది. ప్రముఖ నిర్మాణ సంస్థ హారిక & హాసిని క్రియేషన్స్ బ్యానర్స్ ఎస్. రాధాకృష్ణ (చినబాబు) ప్రతిష్టాత్మకంగా ఈ సినిమాని నిర్మిస్తున్నారు. ఈ చిత్రం 2026 సమ్మర్ లో భారీగా విడుదలకు సిద్ధమవుతోంది.
వెంకటేష్, త్రివిక్రమ్ కలయిక కావడంతో ఇప్పటికే అంచనాలు భారీగా ఉన్నాయి. ఇప్పుడు టైటిల్, ఫస్ట్ లుక్ (Firstlook) విడుదలతో అంచనాలు రెట్టింపు అయ్యాయి. ప్రేక్షకులు, అభిమానులు ఈ అద్భుత కలయిక తెరపై ఏ మాయ చేస్తుందోనని ఆసక్తిగా ఎదురు చూస్తున్నారు. ఆ.. అంచనాలకు ఏ మాత్రం తగ్గకుండా.. హాస్యం, భావోద్వేగాల మేళవింపుతో వెండితెర పై వినోదాల విందుని అందించడానికి సిద్ధమవుతున్నారు. మరి.. వెంకీ, త్రివిక్రమ్ ఏ రేంజ్ సక్సెస్ సాధిస్తారో చూడాలి.
